პროკურატურამ 4 პირს ბრალი წარუდგინა - ამოღებულია 7 კგ და 46 ლიტრი „მეფედრონი“ და „ალფა პვპ“

პროკურატურამ განსაკუთრებით დიდი ოდენობით ნარკოტიკული საშუალების უკანონო შეძენა-შენახვისა და რეალიზაციის ხელშეწყობის ფაქტებზე 4 პირს ბრალდება წარუდგინა. სასამართლომ ოთხივე მათგანს აღკვეთის ღონისძიების სახით პატიმრობა უკვე შეუფარდა.

უწყების ცნობით, შინაგან საქმეთა სამინისტროს მიერ ჩატარებული გამოძიებით დადგინდა, რომ ბრალდებულებმა რეალიზაციის ხელშეწყობის მიზნით უკანონოდ შეიძინეს და ინახავდნენ განსაკუთრებით დიდი ოდენობით ნარკოტიკულ საშუალებებს.

სამართალდამცველებმა ჩატარებული ღონისძიებების შედეგად ნივთმტკიცებად ამოიღეს 5 კილოგრამი და 5 ლიტრი „მეფედრონი“ და 2 კილოგრამი და 41 ლიტრი სითხის სახით არსებული „ალფა პვპ“.

პროკურატურის განცხადებით, ოთხივე ბრალდებულის საცხოვრებელი სახლიდან ასევე ამოღებულია ნარკოტიკული ნივთიერებების დაფასოებისთვის საჭირო ნივთები.

დაკავებულებს ბრალდება საქართველოს სისხლის სამართლის კოდექსის 260-ე მუხლის მე-3 ნაწილის „ა“ ქვეპუნქტითა (განსაკუთრებით დიდი ოდენობით ნარკოტიკული საშუალების უკანონო შეძენა-შენახვა) და 260-ე კვარტა მუხლის მეექვსე ნაწილის „ა“ ქვეპუნქტით (განსაკუთრებით დიდი ოდენობით ნარკოტიკული საშუალების უკანონო რეალიზაციის ხელშეწყობა) წარედგინათ.

აღნიშნული მუხლები სასჯელის სახედ და ზომად 20 წლამდე ან უვადო თავისუფლების აღკვეთას ითვალისწინებს. სისხლის სამართლის საქმეზე გამოძიება გრძელდება.