პუტინმა და სი ძინპინმა უვიზო რეჟიმის მუდმივ ამოქმედებაზე იმსჯელეს
რუსეთის პრეზიდენტი ვლადიმერ პუტინი ჩინელ კოლეგა სი ძინპინს ბიშკეკში, შანხაის თანამშრომლობის ორგანიზაციის სამიტის ფარგლებში შეხვდა. არსებული ინფორმაციით, მხარეებმა ორმხრივი თანამშრომლობის გაღრმავების დინამიკა და ორ ქვეყანას შორის მოქმედი სავიზო რეჟიმის მუდმივ ფორმატში გადაყვანის საკითხი განიხილეს. რუსეთის ლიდერმა შეხვედრაზე ხაზი გაუსვა, რომ მოსკოვსა და პეკინს შორის პარტნიორობა ყველა მიმართულებით წარმატებით ვითარდება. პუტინის განმარტებით, რუსული მხარე მზადყოფნას გამოთქვამს, ჩინეთთან უვიზო რეჟიმის უვადოდ ამოქმედების საკითხზე აქტიურად იმუშაოს.
მოლაპარაკებებში რუსეთის მხრიდან მაღალი რანგის სამთავრობო დელეგაცია მონაწილეობდა. შეხვედრას საგარეო საქმეთა მინისტრი სერგეი ლავროვი, ვიცე-პრემიერი ალექსეი ოვერჩუკი და ეკონომიკური განვითარების მინისტრი მაქსიმ რეშეტნიკოვი ესწრებოდნენ. მოლაპარაკებების პროცესს ენერგეტიკის მინისტრი სერგეი ცივილევი და Rosatom-ის ხელმძღვანელი ალექსეი ლიხაჩოვიც შეუერთდნენ. ამას გარდა, დელეგაციის შემადგენლობაში კრემლის პრესსპიკერი დიმიტრი პესკოვი, პრეზიდენტის თანაშემწე იური უშაკოვი, მაქსიმ ორეშკინი და პირდაპირი ინვესტიციების ფონდის ხელმძღვანელი კირილ დმიტრიევი შედიოდნენ.
ყირგიზეთის დედაქალაქში მიმდინარე 2-დღიანი საერთაშორისო ფორუმის ფარგლებში რუსეთის ლიდერი სხვა ორმხრივი შეხვედრების გამართვასაც გეგმავს. არსებული მონაცემებით, პუტინი ჯამში ცხრა პირისპირ აუდიენციას ჩაატარებს. დაგეგმილ მოლაპარაკებებს შორის რუსეთის პრეზიდენტი ინდოეთის პრემიერ-მინისტრ ნარენდრა მოდის, თურქეთის პრეზიდენტ რეჯეფ თაიფ ერდოღანსა და ყირგიზეთის პრეზიდენტ სადირ ჯაფაროვს შეხვდება.
ცნობისთვის, შანხაის თანამშრომლობის ორგანიზაციის ორდღიან სამიტს ბიშკეკი მასპინძლობს. ღონისძიების მეორე დღეს წევრი ქვეყნების ლიდერთა საბჭოს გაფართოებული სხდომა გაიმართება.
BM.GE
წყარო: bm.ge