პუტინმა ტრამპსა და სი ძინპინს უკრაინის საკითხზე სამმხრივი სამიტი შესთავაზა

რუსეთის პრეზიდენტმა, ვლადიმერ პუტინმა დონალდ ტრამპსა და სი ძინპინს უკრაინის ომის დასასრულებლად ნოემბერში ერთობლივი შეხვედრის გამართვა შესთავაზა. როგორც ირკვევა, ეს ინიციატივა მიზნად სამშვიდობო პირობების შეთანხმებას ისახავს. აღსანიშნავია, რომ დაგეგმილ დიალოგში უკრაინის პრეზიდენტი ვოლოდიმირ ზელენსკი მონაწილეობას არ მიიღებს.

The Wall Street Journal-ის ინფორმაციით, რუსეთის ლიდერმა საკითხი ტრამპთან 9 ოქტომბერს გამართული სატელეფონო საუბრისას წამოჭრა. თავის მხრივ, დიმიტრი პესკოვმა მედიასთან მოლაპარაკებების შესაძლებლობა დაადასტურა და განმარტა, რომ სამივე მხარე შეხვედრის ჰიპოთეზურ შანსს უშვებს.

რაც შეეხება ვაშინგტონს, თეთრი სახლის მაღალჩინოსნის ცნობით, ტრამპს სამმხრივ დიალოგზე საბოლოო თანხმობა ჯერ არ განუცხადებია, თუმცა პრეზიდენტს შეთავაზების მიმართ დადებითი დამოკიდებულება აქვს.

საყურადღებო ფაქტია, რომ კრემლმა შეხვედრის გამართვა 18-19 ნოემბერს ქალაქ შენჯენში დაგეგმილ აზია-წყნარი ოკეანის ეკონომიკური თანამშრომლობის სამიტზე ითხოვა. რუსმა დიპლომატებმა იდეა ჩინურ მხარეს უკვე გააცნეს. პეკინის განცხადებით, დონალდ ტრამპის თანხმობის შემთხვევაში, ჩინეთის ხელისუფლება სამმხრივი დიალოგის წინააღმდეგი არ იქნება.

ანალიტიკოსების შეფასებით, საკუთარ ტერიტორიაზე მსგავსი შეხვედრის მასპინძლობა სი ძინპინის დიპლომატიურ როლს მნიშვნელოვნად გაზრდის.