რა ეტაპზეა საყოველთაო ინტერნეტიზაციის პროექტი?

2027 წლის ბოლოსთვის საქართველოს ყველა წერტილში ინტერნეტთან წვდომა შესაძლებელი გახდება - ამას საყოველთაო ინტერნეტიზაციის სახელმწიფო პროგრამის ახალი გეგმა ითვალისწინებს.

5000 კმ სიგრძის ოპტიკურ-ბოჭკოვანი მაგისტრალური ინფრასტრუქტურა 2025 წლის ბოლოსთვის უნდა აშენებულიყო, თუმცა ვადა 2 წლით გახანგრძლივდა. 50%-ით გაიზარდა პროექტის ბიუჯეტიც.

რეგიონებში ოპტიკურ-ბოჭკოვანი მაგისტრალური ქსელის ასაგებად გამოყოფილი 70 მლნ ევრო საკმარისი არ აღმოჩნდა, რის გამოც საქართველომ მსოფლიო ბანკისგან Log-In Georgia-სთვის დამატებით 40 მილიონი ისესხა.

კომუნიკაციების კომისიის 2025 წლის ანგარიშიდან ირკვევა, რომ გასული წლის ბოლოსთვის 5 ათასი კილომეტრიდან ოპტიკურ ბოჭკოვანი ინფრასტრუქტურით 2035 კილომეტრი ტერიტორია დაიფარა, მშენებლობის ეტაპზე კი 887 კილომეტრია. „ოუფენ ნეტის“ მიერ აშენებული ოპტიკურ-ბოჭკოვანი ინფრასტრუქტურის გამოყენებით, კი უკვე 18 ინტერნეტ პროვაიდერი და 3 მობილური ოპერატორი მომსახურებას 100,000-ზე მეტ მოსახლეს აწვდის.

„Log-in Georgia-ს პროექტის ფარგლებში, ოპტიკურ-ბოჭკოვანი მაგისტრალის მშენებლობა დასრულდა ჭიათურის, საჩხერის, თერჯოლის, ტყიბულის, ჩხოროწყუს, ხობის, სენაკის, წალენჯიხის ნაწილისა და ზუგდიდის მუნიციპალიტეტებში, რაც ჯამურად 575 კმ. ოპტიკურ-ბოჭკოვან ინფრასტრუქტურას მოიცავს. გარდა ამისა, სამშენებლო სამუშაოები მიმდინარეობდა მესტიის, ზესტაფონის, ხარაგაულის, საჩხერის, თერჯოლის, ხაშურის, გორის, ქარელის, კასპის, დუშეთის, მცხეთის, ქედის, ხელვაჩაურისა და შუახევის მუნიციპალიტეტებში, რაც ერთობლივად 1050 კმ. მაგისტრალურ ინფრასტრუქტურას და 200-მდე დასახლებულ პუნქტს მოიცავს.

პროგრამის ფარგლებში დასრულებული და მიმდინარე სამუშაოების მოცულობა 2025 წლის ბოლოს, ჯამურად 3000 კმ. ინფრასტრუქტურას შეადგენდა, რაც 260,000-მდე მოსახლეს და მათთვის შექმნილ ახალ შესაძლებლობებს გულისხმობს. „ოუფენ ნეტის“ მიერ აშენებული ოპტიკურ-ბოჭკოვანი ინფრასტრუქტურის გამოყენებით, უკვე 18 ინტერნეტ პროვაიდერი და 3 მობილური ოპერატორი აწვდის მომსახურებას 100,000-ზე მეტ მოსახლეს და 100-ზე მეტ სკოლას 14 მუნიციპალიტეტში”,-ნათქვამია ანგარიშში.

“მცირე და საშუალო ტელეკომ ოპერატორების ასოციაციის” ინფორმაციით, ინტერნეტიზაციის პროცესმა საბითუმო ფასებზე დიდი გავლენა იქონია. მაგალითად, თუ ადრე ერთი კილომეტრის იჯარა 30-35 ლარი ღირდა, „opennet“-ის ქსელში ეს ფასი 10.40 ლარამდე (დღგ-ს გარეშე) შემცირდა, რაც მცირე ოპერატორებისთვის იდეალური პირობაა.