"რაც დავაბანდეთ 10-ჯერ მეტს ავიღებთ გაყიდვიდან"| რუხაძე ჰყვება, რატომ ვერ გაუყიდა "რაიფაიზენმა" "ლიბერთი"

საინვესტიციო ჰოლდინგ Hunnewell Partners-ის მფლობელი ირაკლი რუხაძე აცხადებს, რომ “ბაზის ბანკისთვის” “ლიბერთი ბანკის” მიყიდვით 10-ჯერ მეტ თანხას მიიღებს ჰოლდინგი, ვიდრე ჩადეს, თუმცა ბიზნესმენმა გარიგების კონკრეტული ღირებულება არც საშა კაცმანის პოდკასტში დაასახელა.

რა ფასად გაიყიდა "ლიბერთი ბანკის" აქციები - საფონდო ბირჟის მონაცემები

"ლიბერთი ბანკი", დაახლოებით, 8 წლის წინ ვიყიდეთ. ახლა რომ შევხედოთ, რა ფასად გამოვედით - "ქეში ქეშზე" [Cash-on-Cash return] რომ ავიღოთ, ღირებულება, დაახლოებით, 10-ჯერ გავზარდეთ ანუ რაც დავაბანდეთ, იმის 10 იმდენს ავიღებთ… რადგან სპეციფიკური გარიგებაა, თანხას ნაწილ-ნაწილ ვიღებთ, თუმცა, როცა სრულად დავიბრუნებთ, ეს იქნება 8 წელიწადში მიღებული 10-ჯერ მეტი ამონაგები”, - თქვა მან “კაცმანის პოდკასტში”.

ირაკლი რუხაძემ ვრცლად ისაუბრა „ლიბერთი ბანკის“ გასხვისების კულუარებსა და საინვესტიციო ჰოლდინგ Hunnewell Partners-ის საინვესტიციო სტრატეგიაზეც.

მისი განმარტებით, Hunnewell Partners-ი კერძო ინვესტიციების კომპანიაა, რომლის დისციპლინა აქტივის ყიდვას, მის გაზრდას და შემდეგ რეალიზაციას გულისხმობს და გაიხსენა, რომ როდესაც "ლიბერთი" შეიძინეს (დაახლოებით, 2018 წელს), ბანკს ნეგატიური მოგება ჰქონდა, თუმცა 8 წელიწადში ვითარება რადიკალურად შეიცვალა და “ლიბერთი” მოგებაზე გავიდა.

"ჩვენი კრიტერიუმია - ბიზნესმა ან უკვე უნდა მოიტანოს 50 მილიონი დოლარი წმინდა მოგება, ან უნდა გვქონდეს ხედვა, როგორ გავიყვანთ ამ ნიშნულზე 5 წლის განმავლობაში. “ლიბერთი” ზუსტად ასეთი ქეისი იყო”, - აღნიშნა მან.

მიუხედავად იმისა, რომ „ლიბერთის“ კაპიტალზე უკუგება (ROE) 20%-ს შეადგენდა, ირაკლი რუხაძე ირწმუნება, რომ ბაზრის ორ დიდ მოთამაშესთან (საქართველოს ბანკი და თიბისი) კონკურენცია გრძელვადიან პერსპექტივაში რთული იქნებოდა.