რეალური უმუშევრობის დონე, შესაძლოა, ოფიციალურ 13.9%-ზე დაბალიც კი იყოს, თუმცა ეს დამახინჯებულ შრომის ბაზარზე მიუთითებს - ფინანსისტი

უმუშევრობის დონე შესაძლოა, საქართველოში შრომის ბაზრის რეალურ სურათს არ ასახავს, - ამის შესახებ ფინანსისტი გიგა ბედინეიშვილი აცხადებს, რომლის შეფასებითაც, ქვეყანაში შექმნილია „არაჯანსაღი მოტივაციის“ სისტემა, რომელიც განსაკუთრებით სოციალურად დაუცველ მოსახლეობას უბიძგებს, ოფიციალურ დაბალანაზღაურებად სამსახურს არალეგალური დასაქმება და ამავდროულად, სახელმწიფო დახმარების მიღება არჩიოს.

ბედინეიშვილის განმარტებით, სოციალური დახმარების დაკარგვის შიშით, ადამიანების ნაწილი ფორმალურ შრომით ურთიერთობებში არ შედის, შედეგად, რეალური უმუშევრობის დონე, შესაძლოა, ოფიციალურ მონაცემებზე - 13.9%-ზე დაბალიც კი იყოს და 10%-ის ფარგლებში მერყეობდეს, თუმცა ეს ფაქტი თავის მხრივ, არაჯანსაღ, ჩრდილოვან ეკონომიკასა და დამახინჯებულ შრომის ბაზარზე მიუთითებს.

„რატომღაც წლების განმავლობაში გვინარჩუნდება უმუშევრობის მაღალი დონე. ფაქტობრივად, ნებისმიერ ეკონომიკური მოდელის პირობებში გვაქვს მაღალი უმუშევრობის მაჩვენებელი, რაც რამდენიმე ფაქტორით არის განპირობებული. თვითონ მოტივაციაც ისეა შექმნილი, რომ დასაქმების სურვილი შემცირებულია. ანუ, ხანდახან ბევრისთვის სჯობია, რომ იმის მაგივრად, რომ დასაქმდეს შედარებით დაბალ ხელფასზე, მიაჩნია, რომ უკეთესია, ვთქვათ, სოციალური დახმარება მიიღოს. ეს ძალიან ცუდ, არაჯანსაღ მოტივაციას ქმნის,“ – აცხადებს გიგა ბედინეიშვილი.

ბედინეიშვილი მიუთითებს, რომ ადამიანები ახერხებენ კომბინაციას, რომ იმუშაონ და სოციალური დახმარებაც მიიღონ. თუმცა რამდენად მასშტაბურია ეს სქემა, ფინანსისტი ამბობს, რომ სპეკულირება არ სურს.

„ხშირად მიიჩნევა ხოლმე პრობლემად, რომ შეიძლება სოციალური დახმარება ზედმეტად ხელგაშლილია, მაგრამ საქართველოში ასე ვერ ვიტყვით. სოციალური დახმარება იმდენად დიდი არ არის, რომ ვთქვათ, რომ მხოლოდ შემწეობის მიღებაზე გააკეთოს ადამიანმა არჩევანი, მაგრამ თუ ამის კომბინირებას ახერხებს რაღაცნაირად, თან არალეგალურად მუშაობ და თან სოციალურ დახმარებასაც იღებ, ეს, რა თქმა უნდა, არის საერთო სტატისტიკას ამახინჯებს. მე ამით რას ვამბობ, არის ის, რომ რეალური უმუშევრობა უფრო ნაკლები იქნება, ვიდრე ოფიციალურად გამოქვეყნებული ( მაგრამ მაინც მაღალი იქნება, დარწმუნებული ვარ, 10%-ის ფარგლებში). ამ კუთხით მივდივართ ჩვევებსა და უნარებთან, რაც ბაზრის მოთხოვნასთან აცდენილია“, - ფიქრობს ბედინეიშვილი.

ექსპერტის თქმით, ეს ფაქტორი სახელმწიფოს მხრიდანაც ქმნის პოლიტიკურ ბერკეტს, რადგან სოციალურ დახმარებაზე დამოკიდებული მოსახლეობა უფრო მეტად მოწყვლადია პოლიტიკური გავლენების მიმართ.