რესტორანი და პანორამული გადასახედები|როდის დასრულდება თბილისის ანძის ₾50-მილიონიანი პროექტი

კომპანია “კასს გრუპი” თბილისის ანძის მოდერნიზაციის საინვესტიციო პროექტს 2028 წელს დაასრულებს.

ამის შესახებ BMGTV-ის გადაცემა “წერტილში” კომპანიის გენერალურმა დირექტორმა ეკატერინე თორდიამ განაცხადა.

თბილისის ანძის მოდერნიზაციის პროექტი გულისხმობს რესტორნის, პანორამული გადმოსახედებისა და ვიზიტორთა ცენტრის მოწყობას. თბილისის მერიამ ობიექტი ”კასს გრუპს” 25-წლიანი მართვისა და სარგებლობის უფლებით გადასცა. საინვესტიციო ჰოლდინგს ადგილზე 4 მილიონი დოლარის ინვესტიციის განხორციელების ვალდებულება აქვს.

"დარწმუნებული ვართ, ეს სივრცე დედაქალაქის ახალ მიზიდულობის ცენტრად იქცევა. ჩვენი ჩანაფიქრით, საქართველოში ჩამოსული ყოველი ტურისტი აუცილებლად ესტუმრება როგორც თბილისის ანძას, ისე ჩვენს მეორე უნიკალურ პროექტს. ეს იქნება ერთგვარი მარშრუტი, რომელიც ვიზიტორებს სრულყოფილ, საინტერესო დღეს შესთავაზებს. ჩვენი მთავარი მიზანია, თითოეული სტუმარი ქვეყნიდან კმაყოფილი წავიდეს და მსოფლიოში საქართველოს უნიკალურობის თავისებურ ელჩად იქცეს", - ამბობს ის.

ეკატერინე თორდიას თქმითვე, კომპანიამ უკვე მიიღო მშენებლობის ნებართვა, მოეწყო სამშენებლო მოედანი და დაწყებულია სამუშაოები.

“თბილისის სატელევიზიო ანძის მოდერნიზაციისთვის, დაახლოებით, 50 მილიონი ლარის ინვესტიცია განხორციელდება”, - ამბობს კომპანიის დირექტორი და იმედოვნებს, რომ მოდერნიზებული ანძა ტურისტებისთვის ისეთივე მიმზიდველი ლოკაცია იქნება, როგორიც წალკის კანიონია.

"წალკის კანიონისგან განსხვავებით, აქ გაცილებით რთული ბიუროკრატიული პროცესების გავლა მოგვიწია. ეს ბუნებრივიცაა, ვინაიდან თბილისის სატელევიზიო ანძა ჩვენი დედაქალაქის მთავარი სიმბოლოა. ჩვენი მიზანი, ერთი მხრივ, პროექტის ავთენტიკურობის შენარჩუნება იყო, ხოლო მეორე მხრივ - ანძის სრული მოდერნიზაცია და განახლება. პროცესში ჩართული იყო უამრავი ადგილობრივი და საერთაშორისო დონის ექსპერტი, სპეციალისტი და ინჟინერი.

რამდენიმეწლიანი ინტენსიური მუშაობის შედეგად, მშენებლობის ნებართვა უკვე მოვიპოვეთ და ამჟამად აქტიურ ფაზაში ვართ. მიმდებარე ტერიტორიაზე უკვე დასრულდა ძველი ნაგებობების დემონტაჟი და აშენდა ახალი სასაწყობე ფართი, სადაც თბილისის ტელეცენტრის ძველი კონსტრუქციები და მასალები დასაწყობდება. ახლა უკვე უშუალოდ ანძას ვუახლოვდებით და უახლოეს პერიოდში საძირკვლის მოწყობის სამუშაოებს დავიწყებთ. თუ ყველაფერი გეგმის მიხედვით წარიმართა, განახლებულ თბილისის ანძას 2028 წელს ვიხილავთ", - აცხადებს ეკატერინე თორდია.