როდის და სად მიდის ლაგარდი?
ევროპის ცენტრალური ბანკის პრეზიდენტმა, კრისტინ ლაგარდმა დაადასტურა, რომ იგი თანამდებობას 2027 წელს დატოვებს, თუმცა უარი განაცხადა იმის დაზუსტებაზე, დარჩება თუ არა პოსტზე უფლებამოსილების ოფიციალურ ამოწურვამდე, კერძოდ 2027 წლის ოქტომბრამდე. შესაბამისად, უცნობია, აპირებს თუ არა ის პრეზიდენტობიდან ნებაყოფლობით გადადგომას.
RTE Radio-სთან ინტერვიუში კითხვას, ნიშნავს თუ არა ეს ოქტომბერში წასვლას, მან უპასუხა: „ვნახოთ“.
ევროპის ცენტრალური ბანკის ხელმძღვანელმა ხაზი გაუსვა, რომ პრეზიდენტობის გადაბარების პროცესი მაღალი პროფესიონალიზმით წარიმართება, თუმცა მას დეტალები არ განუმარტავს და არც ის უთქვამს, თუ ვინ გადაიბარებს ევროპის მთავარი ბანკირის ტვირთს.
ცნობისთვის, ლაგარდის სავარაუდო ვადამდელ წასვლაზე დისკუსია მას შემდეგ გააქტიურდა, რაც ცნობილი გახდა, რომ იგი იანვარში მემუარების გამოცემას გეგმავს. პარალელურად ვრცელდება ცნობები, რომ დავოსის მსოფლიო ეკონომიკური ფორუმის მმართველი საბჭო მას აღმასრულებელი დირექტორის პოსტს სთავაზობს.
ამასთან, არსებობს სპეკულაციები იმასთან დაკავშირებით, რომ შესაძლოა ლაგარდმა საფრანგეთის არჩევნებში იბრძოლოს, თუმცა ეს პერსპექტივა ამჟამად ნაკლებად სავარაუდო ჩანს.
BM.GE
წყარო: bm.ge