როგორ შეიცვალა რუსეთში ინფლაცია?

გასულ თვეს, წლიური ინფლაციის დონემ რუსეთში კლება განაგრძო და 5.6% შეადგინა, რაც წინა პერიოდში გატარებული მკაცრი მონეტარული პოლიტიკის შედეგებით, რუბლის შედარებითი სტაბილურობითა და საბაზისო ინფლაციის შემცირებით არის განპირობებული.

რაც შეეხება კონკრეტულ სექტორებს, Rosstat-ის მიერ გავრცელებული ინფორმაციით, სურსათის ინფლაცია მარტის 5%-იანი მაჩვენებლიდან აპრილში 4%-მდე შემცირდა, რაც ხილსა და ბოსტნეულზე ფასების მკვეთრმა კლებამ განაპირობა.

პარალელურად, ფასები გაიზარდა არასასურსათო პროდუქტებზე, მომსახურების სექტორში კი მაღალი ნიშნული შენარჩუნდა და მაჩვენებელმა 9.9% შეადგინა. აღსანიშნავია, რომ ყოველთვიურ ჭრილში, მარტში დაფიქსირებული 0.6%-იანი ზრდის შემდეგ, აპრილში ინფლაცია 0.1%-ით გაიზარდა.

მნიშვნელოვანია ითქვას, რომ რუსეთის ცენტრალური ბანკის ხელმძღვანელმა, ელვირა ნაბიულინამ ინფლაციის ტრაექტორიაზე საუბრისას აღნიშნა, რომ უწყება მიმდინარე წელს 4%-იანი მიზნობრივი მაჩვენებლის მიღწევას და ხუთწლიანი მაღალი ინფლაციის პროცესის დასრულებას გეგმავს.

უწყების პროგნოზით, 2026 წელს წლიური ინფლაცია 4.5–5.5%-მდე შემცირდება, 2027 წლისთვის კი მიზნობრივ 4%-იან ნიშნულს დაუბრუნდება. თუმცა, ანალიტიკოსების შეფასებით, 2026 წელს ამ მაჩვენებლის მიღწევა რთული იქნება და ინფლაციის საშუალო პროგნოზი 2026 წლისთვის 5.9%-ს, ხოლო 2027 წლისთვის 5.2%-ს შეადგენს.

აღსანიშნავია, რომ დამოუკიდებელ ექსპერტთა ნაწილი Rosstat-ის მონაცემებს არ ეთანხმება და სტატისტიკის სამსახურს "რიცხვების წვალებაში" ადანაშაულებს.