როგორი ფინანსური შედეგები აქვს PepsiCo-ს?

გამაგრილებელი სასმელებისა და კვების ინდუსტრიის ამერიკული გიგანტის, PepsiCo-ს მეორე კვარტალის შემოსავალმა, უოლ-სტრიტის პროგნოზებს გადააჭარბა, რაც უშაქრო სასმელებსა და პროტეინით მდიდარ პროდუქტებზე გაზრდილმა მოთხოვნამ განაპირობა.

არსებული ინფორმაციით, კომპანიის კვარტალურმა შემოსავალმა გასული წლის ანალოგიურ პერიოდთან შედარებით 6.4%-ით იმატა და $24.18 მილიარდი შეადგინა, მაშინ როცა ანალიტიკოსები მაჩვენებლის 5.4%-იან ზრდას და $23.95 მილიარდის მიღწევას ვარაუდობდნენ. მნიშვნელოვანია ითქვას, რომ კომპანიის კვარტალურმა სუფთა მოგებამ თითო აქციაზე (EPS) $2.20 შეადგინა, რაც წინა წლის მაჩვენებელს ($2.12) აღემატება.

ამასთან, კომპანიამ მიმდინარე ფისკალური წლის პროგნოზები უცვლელად დატოვა. PepsiCo-ს ხელმძღვანელობა 2026 წელს ორგანული შემოსავლის 2%-დან 4%-მდე ზრდას ვარაუდობს, ხოლო ძირითადი მოგება თითო აქციაზე, მუდმივ სავალუტო კურსში, 4%-დან 6%-მდე დიაპაზონში გაიზრდება.

ფინანსური დირექტორის განცხადებით, მიმდინარე წლის მეორე ნახევარში საწარმოო ხარჯების ინფლაციაა მოსალოდნელი, თუმცა გასულ წელს გადახდილი ტარიფების დაბრუნება და პროდუქტიულობის დაზოგვა ამ დარტყმას შეამსუბუქებს.

რაც შეეხება რეაქციას საფონდო ბირჟაზე, ფინანსური შედეგების გასაჯაროების ფონზე, PepsiCo-ს აქციების შეფასება 5%-ით შემცირდა.