როგორც ყველა რეგულაციას, ამასაც ორი მხარე აქვს - ირაკლი უგლავა ღვინის სერტიფიცირების საფასურზე
ადგილობრივ ბაზარზე ღვინის სერტიფიცირების ვალდებულება დარგისთვის დამატებითი ხარჯია, თუმცა საშუალო და მსხვილი კომპანიებისთვის ეს დიდი ტვირთი არაა - ამის შესახებ “მეღვინეობა შილდას” დირექტორი აცხადებს.
როგორც ირაკლი უგლავამ “საქმის კურსის” ეთერში განაცხადა, აღნიშნული ვალდებულება ერთი მხრივ, დამატებით ბიუროკრატიას მოითხოვს, თუმცა მეორე მხრივ, პროდუქციის სანდოობის გაზრდის თვალსაზრისით ბიზნესისთვის სარგებლის მომტანია.
“ისევე როგორც ყველა რეგულაციას, ამასაც ორი მხარე აქვს. ერთი მხრივ, კარგია მომხმარებლისთვის, რომ პრაქტიკულად დარწმუნებული არის თითოეული წარმოებული ბოთლის ხარისხში. იმიტომ რომ სერტიფიკატს ეს მოაქვს, თითოეული ლოტი ღვინიდან თვითონ ნიმუში მიდის ღვინის სააგენტოში და კონტროლდება ხარისხი. ამის გამოყენება კარგად შეიძლება მარკეტინგულადაც და ჩვენ საკმაოდ კარგად ვიყენებთ ჩვენს პარტნიორებთან, იმპორტიორებთან. ვიყენებდით იმ რეგულაციებსაც, რაც დანერგილია მათ შორის ელექტრონული კადასტრი, სახელმწიფოს თანდასწრება ყურძნის მიღების დროს, გადამუშავების დროს, პრინციპში, ყველა ამ თემის გამოყენება მარკეტინგულადაც კარგად შეიძლება.
თუმცა მეორე მხრივ, დამატებით საკმაოდ დიდი სამუშაოა, მათ შორის ჩვენგანაც ითხოვს დამატებით რესურსს, დამატებით თანამშრომლების აყვანას და ხარჯიანია. მესმის პატარა მარნების, რომელთათვისაც მტკივნეულია ეს საკითხი. ალბათ არსებობს რაღაც გადაწყვეტები ევროპულ ქვეყნებში. თუმცა ჩვენ ამ რეგულაციას ვემორჩილებით და მივყვებით, ჩვენთვის იმდენად მტკივნეული არ არის, იმიტომ რომ დიდი კომპანიები სერტიფიკატს ექსპორტზე ისედაც ვაკეთებდით და ადგილობრივი ბაზარი იმდენად მცირე არის ზოგადად მეღვინეობისთვის, რომ ეს თემა დიდ ტვირთად არ გვაწვება. მსხვილი და საშუალო კომპანიებისთვის იმდენად მტკივნეული არ არის, არც ხარჯების თვალსაზრისით, არც ე.წ. ბუღალტერიის თვალსაზრისით, რომელიც გაუჩნდათ პატარა მარნებს, რომლებიც ძირითადად ადგილობრივ ბაზარზე ყიდიან თავიანთ პროდუქციას”, - განაცხადა ირაკლი უგლავამ.
ცნობისთვის, ადგილობრივ ბაზარზე ღვინის რეალიზაციისთვის შესაბამისობის სერტიფიკატის საფასური 1 სექტემბერს ამოქმედდა, რომლის ტარიფიც 10 ლარით განისაზღვრა. მოგვიანებით ღვინის ეროვნულმა სააგენტომ აღნიშნული გადასახადი მცირე მარნებისთვის გააუქმა, თუმცა ძალაში დატოვა თავად სერტიფიცირების ვალდებულება.
BM.GE
წყარო: bm.ge