რუსეთი და ოკუპირებული აფხაზეთი სასტუმროების კლასიფიკაციის სტანდარტების დაახლოებაზე მუშაობენ - ინტერფაქსი

რუსეთი და ოკუპირებული აფხაზეთი სასტუმროების კლასიფიკაციის სტანდარტების დაახლოებაზე, რესპუბლიკაში დასასვენებლად მიმავალი რუსეთის მოქალაქეების დაზღვევასა და ტურისტების აღრიცხვის მეთოდოლოგიაზე მუშაობენ, - ინფორმაციას რუსული „ინტერფაქსი“ რუსეთის ეკონომიკური განვითარების სამინისტროს მრავალმხრივი ეკონომიკური თანამშრომლობისა და სპეციალური პროექტების დეპარტამენტის დირექტორის ნიკიტა კონდრატიევის განცხადებაზე დაყრდნობით ავრცელებს.

„ჩვენ სასტუმროების კლასიფიკაციის სტანდარტების დაახლოების კუთხით დიდ სამუშაოს ვატარებთ. ეს, ალბათ, ერთ-ერთი საკვანძო საკითხია. კარგია, როდესაც ტურისტს ესმის, რომ თუ ის რუსეთში „ოთხვარსკვლავიანში“ ან „ხუთვარსკვლავიანში“ წავიდა, და თუ ის ჩამოდის აფხაზეთში, მას აქაც ესმის, რომ ეს არის „ოთხიანი“ ან „ხუთიანი“ და მოთხოვნები ემთხვევა. მეორე საკითხად მე სტატისტიკის მეთოდოლოგიის დაახლოებას აღვნიშნავდი. ანუ ჩვენ ყოველთვის არ ვიცით რუსი ტურისტების ზუსტი რაოდენობა, რომლებიც აფხაზეთში ჩადიან. ამ მიმართულებით საჭიროა დამატებითი მუშაობა და ხარვეზების გამოვლენა, რომელთა კორექტირებაც შესაძლებელი იქნება“, - განაცხადა მან პრესკონფერენციაზე, რომელიც გასულ კვირაში ოკუპირებულ რეგიონში ზაფხულის სეზონის დაწყებას მიეძღვნა.

რუსეთის ეკონომიკური განვითარების სამინისტროს მრავალმხრივი ეკონომიკური თანამშრომლობისა და სპეციალური პროექტების დეპარტამენტის დირექტორის თქმით, ოკუპირებული აფხაზეთში კოლეგებთან ტურისტების დაზღვევის საკითხიც განიხილება.

„იმისათვის, რომ დაზღვევა რუსი ტურისტებისთვის, რომლებიც აფხაზეთში ჩამოდიან, გახდეს: უფრო ხელმისაწვდომი და ფარავდეს შემთხვევების უფრო დიდ რაოდენობას, რათა ტურისტებისთვის დასვენება უფრო კომფორტული გახდეს. ეს არის სამი საკვანძო მომენტი, რომლებიც, უპირველეს ყოვლისა, უნდა დასრულდეს, რათა ჩვენთვისაც, როგორც სახელმწიფო ორგანოებისთვის, მუშაობა უფრო კომფორტული გახდეს, ჩვენი ბიზნესისთვისაც და, შესაბამისად, იმ მოქალაქეებისთვისაც, რომლებიც იქ დასასვენებლად დადიან“, - დასძინა რუსეთის ეკონომიკური განვითარების სამინისტროს წარმომადგენელმა.