რუსეთისთვის ეკონომიკური სანქციების დაწესება მხოლოდ "ბორჯომის" ან ვაშლის გაყიდვაზე უარი არ არის|ნიკოლოზ სამხარაძე
პარლამენტის საგარეო ურთიერთობათა კომიტეტის თავმჯდომარე ნიკოლოზ სამხარაძის განცხადებით, რუსეთისთვის ეკონომიკური სანქციების დაწესება მხოლოდ ეკონომიკურ აქტს არ წარმოადგენს.
ამის შესახებ მან “რუსთავი 2”-ზე განაცხადა, სადაც დებატების თემა საქართველოს ევროინტეგრაცია იყო და კიდევ ერთხელ ისაუბრა, რატომ არ დაუწესა საქართველომ რუსეთს სანქციები.
“ხომ კარგად ვიცით, რომ საქართველოს მიერ რუსეთისთვის ეკონომიკური სანქციების დაწესება მხოლოდ “ბორჯომის” ან ვაშლის და მსხლის გაყიდვაზე უარი კი არ არის, არამედ ეს არის ძალიან დიდი პოლიტიკური აქტი და ამ პოლიტიკურ აქტს რა ნაბიჯები შეიძლება მოჰყვეს რუსეთისგან, მგონი, ყველასთვის ნათელია. ეს არ იქნება მხოლოდ ის, რომ რუსეთი თვითონაც აკრძალავს წიწიბურას ექსპორტს საქართველოში. მით უმეტეს თუ გავითვალისწინებთ იმას, რომ ჩვენი ტერიტორია ოკუპირებულია, 35 კმ-ში რუსები დგანან, აფხაზეთის და ცხინვალის მიმართულებით საკმაოდ საგანგაშო ნაბიჯებია გადადგმული და ა.შ. ანუ ჩვენ ამ ნაბიჯით დიდ საფრთხეს შევუქმნიდით არა მხოლოდ საქართველოს ეკონომიკას, არამედ - საქართველოს სახელმწიფოებრიობას”, - განაცხადა ნიკოლოზ სამხარაძემ.
საპარლამენტო უმრავლესობის წევრი ირწმუნება, რომ სანქციების დაწესების შემთხვევაში, დასავლეთი საქართველოს კონკრეტულ დახმარებას ვერ ჰპირდებოდა.
“ჩვენ გვქონდა საუბარი - თუ დავაწესებთ სანქციებს, თქვენგან რა დახმარება შეიძლება წამოვიდეს. გაგვიხსნით სასოფლო-სამეურნეო პროდუქციის ბაზარს? დაგვეხმარებით? იქიდან მხრების აჩეჩვა იყო პასუხი. ამიტომ სანქციების დაწესება არაა მხოლოდ ეკონომიკური აქტი”, - აღნიშნა მან.
BM.GE
წყარო: bm.ge