რუსული Wildberries-ი ყაზახეთში 260 ათას მ²-ზე დიდ საწყობს აშენებს

რუსული ელექტრონული კომერციის გიგანტი Wildberries-ი ყაზახეთში 260 000 კვადრატულ მეტრზე მეტი ფართობის ლოგისტიკურ საწყობებს აშენებს. ამის შესახებ 4 აგვისტოს ყაზახეთის ვაჭრობისა და ინტეგრაციის მინისტრმა, არმან შაკალიევმა განაცხადა. აღნიშნული ნაბიჯით რუსული კომპანია ცდილობს, საკუთარი ლოგისტიკური ქსელი უკრაინული უპილოტო საფრენი აპარატების თავდასხმებისგან დაიცვას.

Wildberries-ი 100 000 კვ.მ.-ზე მეტი ფართობის საწყობს ყაზახეთის დედაქალაქ ასტანასთან ახლოს, ხოლო მეორე, 160 000 კვ.მ. ობიექტს ქვეყნის უდიდეს ქალაქ ალმათიში ააშენებს. ორივე ობიექტის მშენებლობის დასრულება 2027 წლის პირველ კვარტალში იგეგმება. ცენტრალური აზიის ამ ქვეყანაში Wildberries-ი ამჟამადაც იჯარით ფლობს დაახლოებით 46 000 კვადრატული მეტრის საწყობს.

რუსეთის საგარეო საქმეთა მინისტრის მოადგილის, მიხაილ გალუზინის მტკიცებით, მოსკოვმა და ასტანამ ონლაინ-პლატფორმების ინტეგრაციაზე მუშაობა რუსეთში Wildberries-ის საწყობებზე უკრაინულ იერიშებამდე დაიწყეს. მან აღნიშნა, რომ Ozon-ისა და Wildberries-ის პლატფორმებზე უკვე დარეგისტრირებულია ასობით ათასი ყაზახი მომწოდებელი, თუმცა კონკრეტული გარიგებების დეტალებზე არ ისაუბრა და ჟურნალისტებს ინფორმაციის უშუალოდ კომპანიებისგან გადამოწმება ურჩია.

რუსული ბიზნესგამოცემა „კომერსანტის“ 29 ივლისის ცნობით, Wildberries-მა ყაზახეთში საწყობების ძებნა მას შემდეგ დაიწყო, რაც უკრაინამ რუსეთის ტერიტორიაზე მდებარე მის ლოგისტიკურ ჰაბებზე დრონებით იერიშები მიიტანა. გამოცემის წყაროების ცნობით, ყაზახეთში არსებული შეზღუდული მიწოდების ფონზე, კომპანია მზად იყო შეესყიდა თითქმის ყველა თავისუფალი საწყობი, რათა თავისი სიმძლავრეების ნაწილი მოსალოდნელი იერიშების ზონიდან გადაეტანა. მათივე ინფორმაციით, Wildberries-ი რუსეთშიც აგრძელებს ახალი საწყობების ძებნას, თუმცა თავისუფალი ფართობების მფლობელები, დრონების თავდასხმის მუდმივი საფრთხის გამო, კომპანიასთან საიჯარო ხელშეკრულებების გაფორმებისგან თავის შეკავებას არჩევენ.

ბოლო კვირების განმავლობაში უკრაინულმა ძალებმა დრონებით იერიში Wildberries-ის სულ მცირე 12 ობიექტზე მიიტანეს.