საჯარო სამსახურში კორუფციის პრევენციის მექანიზმები არ არსებობს - სანდრო ქევხიშვილი
სახელმწიფო აუდიტის სამსახურის ბოლო დასკვნები კიდევ ერთხელ ადასტურებს, რომ კორუფციის პრევენციის მექანიზმების არარსებობა ქართულ საჯარო სექტორში სისტემური პრობლემაა - ამის შესახებ BMG-სთან „საერთაშორისო გამჭვირვალობა - საქართველოს“ (TI) ანტიკორუფციული პროგრამის მენეჯერი სანდრო ქევხიშვილი აცხადებს.
მისი თქმით, აუდიტის დასკვნები, რომლებიც სხვადასხვა სახელმწიფო უწყებას, მათ შორის ნავთობისა და გაზის კორპორაციას ეხება, თითქმის იდენტურ სურათს აჩვენებს. როგორც ქევხიშვილი განმარტავს, პრობლემა არა მხოლოდ კონკრეტულ დარღვევებში, არამედ იმ შიდა მექანიზმების არარსებობაშია, რომლებმაც კორუფცია უნდა აღკვეთოს.
„ბიუჯეტის თანხებს, რომლებიც სხვადასხვა მიმართულებით მიიმართება, არავინ აკონტროლებს ისე, რომ კორუფციის ნიშნები გამოვლინდეს. არ არსებობს შიდა მექანიზმები რომ გააკონტროლოს ელემენტარული საკითხები - საწვავს ვინ ასხამს? ვის ეყოლება მანქანა და შეუძლია თუ არა მისი პირადი მიზნებისთვის გამოყენება? პრემია რატომ რიგდება? თანამშრომელი მართლა გვჭირდება, თუ ეს ვიღაცის დასაქმების საშუალებაა? აი, ამ პრობლემების პრევენციის მექანიზმები არ არსებობს“, - აცხადებს ქევხიშვილი.
მისივე თქმით, ეს ვითარება განსაკუთრებით მძიმეა მუნიციპალურ დონეზე და სახელმწიფო შპს-ებში, რაც მიუთითებს იმაზე, რომ „ეს პრობლემა სისტემურია და არა მხოლოდ ერთი რომელიმე უწყების“.
ამასთან, „საერთაშორისო გამჭვირვალობა - საქართველოს“ ანტიკორუფციული პროგრამის მენეჯერი მიიჩნევს, რომ მმართველი გუნდის მხრიდან კორუფციაზე რეაგირება ხშირად არა სისტემურ ცვლილებებს, არამედ შიდაპარტიულ ინტერესებს ემსახურება.
„ჩვენი დასკვნით, ბოლო პერიოდში დაწყებული კორუფციული გამოძიებები უფრო მეტად ემსახურება „ქართული ოცნების“ შიდა გარჩევებს. გამოძიება გამოიყენება ახალი გუნდის მიერ ძველი გუნდის შევიწროებისთვის და არა რეალური კორუფციასთან ბრძოლისთვის. რეალური ბრძოლა იქნებოდა მექანიზმების შექმნა, რომ ეს პრობლემა არსად აღარ განმეორდეს, რისი ნიშნებიც არ ჩანს“.