საქართველო უკრაინის მოქალაქეებისთვის სამედიცინო და ფინანსურ დახმარებას 2027 წლამდე აგრძელებს

საქართველოს მთავრობის გადაწყვეტილებით, უკრაინაში მიმდინარე ომის გამო საქართველოში შემოსული და უწყვეტად მყოფი უკრაინის მოქალაქეები სამედიცინო სერვისებსა და ფინანსურ დახმარებას 2027 წლის 1 იანვრამდე მიიღებენ.

შესაბამის განკარგულებებს ხელს ირაკლი კობახიძე აწერს.

სოციალურ-ეკონომიკურ მხარდაჭერას სოციალური მომსახურების სააგენტო უზრუნველყოფს. პროგრამის ფარგლებში გათვალისწინებულია:

• 300 ლარი თვეში ოჯახზე (საცხოვრებელი პირობების შექმნისთვის); • 45 ლარი თვეში თითოეულ პირზე.

მნიშვნელოვანი პირობა: 45-ლარიანი დახმარება მომდევნო თვიდან შეუწყდება პირს, რომელიც საქართველოს ტერიტორიას დატოვებს. ხოლო 300-ლარიანი დახმარება ოჯახს იმ შემთხვევაში შეუწყდება, თუ ქვეყნიდან მისი ყველა წევრი გავა.

ამასთან, უწყვეტად ყოფნაში ჩაითვლება ის შემთხვევებიც, როდესაც პირმა გადაკვეთა საქართველოს საზღვარი და უკან არაუმეტეს 3 დღის ვადაში დაბრუნდა.

ჯანდაცვის სერვისების მიწოდებას დევნილთა, შრომის, ჯანმრთელობისა და სოციალური დაცვის სამინისტრო უზრუნველყოფს. სახელმწიფო პროგრამების ფარგლებში უკრაინის მოქალაქეები ისარგებლებენ შემდეგი უფასო მომსახურებებით:

• გადაუდებელი დახმარება: რეფერალური მომსახურება, გადაუდებელი სამედიცინო სერვისები, მშობიარობა და გადაუდებელი იმუნიზაცია; • ქრონიკული და მძიმე დაავადებების მართვა: დიაბეტისა და ტუბერკულოზის მკურნალობა (მედიკამენტებით უზრუნველყოფით), დიალიზი, აივ-ინფექციის/შიდსის მკურნალობა, იშვიათი დაავადებების მქონე პაციენტების მუდმივი ჩანაცვლებითი თერაპია; • სხვა სერვისები: გეგმური იმუნიზაცია, ფსიქიკური ჯანმრთელობა, დედათა და ბავშვთა ჯანმრთელობა (ორსულთა ანტენატალური მეთვალყურეობა და ახალშობილთა სკრინინგი).