საწვავის კრიზისის გამო, ავიაკომპანიები აშშ-ის მთავრობას დახმარებას სთხოვენ

ამერიკულმა დაბალბიუჯეტიანმა ავიაკომპანიებმა, მათ შორის Frontier-მა და Avelo-მ, ტრამპის ადმინისტრაციას $2.5 მილიარდის ოდენობის ფედერალური დახმარების თხოვნით მიმართეს.

ინდუსტრიის წარმომადგენლები აღნიშნულ თანხას ირანში მიმდინარე კონფლიქტის გამო გაზრდილი საწვავის ხარჯების კომპენსირებისთვის ითხოვენ. სანაცვლოდ, გადამზიდავები მთავრობას ვორანტებს სთავაზობენ, რაც მომავალში სახელმწიფოსთვის ავიაკომპანიების კაპიტალში წილის ფლობის შესაძლებლობას წარმოადგენს.

როგორც ირკვევა, ავიაკომპანიების ხელმძღვანელები ტრანსპორტის მდივან შონ დაფისა და ფედერალური ავიაციის ადმინისტრაციის ხელმძღვანელ ბრაიან ბედფორდს უკვე შეხვდნენ.

აღსანიშნავია, რომ დაფინანსების მსგავსი მოდელი აშშ-ის მთავრობამ პანდემიის პერიოდშიც გამოიყენა, როდესაც ფინანსური დახმარების სანაცვლოდ მიღებული ფასიანი ქაღალდები მოგვიანებით ფინანსთა სამინისტრომ რეალიზაციაში გაუშვა.

არსებული ინფორმაციით, ირანში აშშ-ისა და ისრაელის სამხედრო მოქმედებების დაწყების შემდეგ, საავიაციო საწვავის ფასი 100%-ზე მეტით გაიზარდა.