საწვავის ოთხწლიან მაქსიმუმამდე გაძვირების ფონზე, ტრამპი ბენზინზე ფედერალური გადასახადის შეჩერების პირობას დებს

დონალდ ტრამპმა პირობა დადო, რომ ბენზინზე აშშ-ის ფედერალურ გადასახადს შეაჩერებს, რათა შეამსუბუქოს წნეხი ამერიკელებზე მას შემდეგ, რაც ირანზე აშშ-ისრაელის ომმა საწვავის ფასების მკვეთრი ზრდა გამოიწვია.

აშშ-ის პრეზიდენტმა ჟურნალისტებს განუცხადა, რომ მისი ადმინისტრაცია განიხილავს გადასახადის შეჩერებას "მანამ, სანამ ეს მიზანშეწონილი იქნება".

ბენზინზე ფედერალური გადასახადი - 18.4 ცენტი თითო გალონ ბენზინზე (1 ამერიკული გალონი ≈ 3.78 ლიტრი) და 24.4 ცენტი დიზელზე - ფედერალური მთავრობისთვის ყოველკვირეულად დაახლოებით 500 მილიონ დოლარს აგროვებს.

"ეს შესანიშნავი იდეაა. დიახ, ჩვენ გარკვეული დროით მოვხსნით ბენზინის გადასახადს, და როდესაც ფასი დაიკლებს, მას ეტაპობრივად ისევ დავაბრუნებთ", - განუცხადა ტრამპმა ორშაბათს CBS News-ს

მოგვიანებით, თეთრ სახლში საჯარო გამოსვლისას, მან ეს იდეა დაადასტურა და აღიარა, რომ ბენზინის გადასახადი გაზრდილი ხარჯების მხოლოდ მცირე პროცენტს შეადგენდა.

AAA-ს მონაცემებით, ბენზინის ეროვნულმა საშუალო ფასმა გალონზე 4.52 დოლარს მიაღწია, რაც 2022 წლის შემდეგ ყველაზე მაღალ ნიშნულს უახლოვდება - ერთი წლის წინ ეს მაჩვენებელი გალონზე 3.14 დოლარი იყო.

გადასახადის შესაჩერებლად კონგრესის თანხმობაა საჭირო. რესპუბლიკელმა კანონმდებლებმა დაუყოვნებლივ განაცხადეს, რომ გადასახადის შესაჩერებლად კანონპროექტებს წარადგენენ.

ნავთობის ფასებმა ზრდა მას შემდეგ გააგრძელა, რაც ტრამპმა ირანის პასუხს აშშ-ის სამშვიდობო წინადადებებზე "სრულიად მიუღებელი" უწოდა.

საწვავის ფასების ზრდის ფონზე, ნავთობისა და გაზის წამყვანმა კომპანიებმა დიდი მოგება მიიღეს. Guardian-ის ანალიზმა აჩვენა, რომ ირანში აშშ-ისრაელის ომის პირველ თვეში მსოფლიოს 100-მა საუკეთესო ნავთობისა და გაზის კომპანიამ "ყოველ საათში 30 მილიონ დოლარზე მეტი არარეალიზებული მოგება დააგროვა".