საუდის არაბეთმა და ქუვეითმა აშშ-ის ძალებისთვის საჰაერო სივრცე და ბაზები გახსნეს
საუდის არაბეთმა და ქუვეითმა აშშ-ის სამხედროებისთვის საკუთარი ბაზებისა და საჰაერო სივრცის გამოყენებაზე დაწესებული შეზღუდვები გააუქმეს. როგორც ირკვევა, აღნიშნული გადაწყვეტილება პრეზიდენტ ტრამპის ადმინისტრაციას ჰორმუზის სრუტის ოპერაციის უფრო მარტივად გაგრძელების შესაძლებლობას მისცემს. არსებული ინფორმაციით, თეთრი სახლი კომერციული გემების ესკორტირების პროცესის, სახელწოდებით Project Freedom, უახლოეს დღეებში განახლებას გეგმავს. პენტაგონში განმარტავენ, რომ რამდენიმე დღის წინ შეჩერებული ოპერაცია შესაძლოა მიმდინარე კვირაშივე გააქტიურდეს.
ცნობისთვის, ერ-რიადმა და ელ-ქუვეითმა ვაშინგტონს წვდომა მას შემდეგ შეუზღუდეს, რაც ამერიკულმა მხარემ სპარსეთის ყურეში ირანის თავდასხმები სათანადოდ არ შეაფასა. საუდის არაბეთი და რეგიონის სხვა ქვეყნები შიშობდნენ, რომ აშშ მათ ირანული აგრესიისგან არ დაიცავდა. თუმცა დიპლომატიური და სამხედრო გაუგებრობა მას შემდეგ გაქარწყლდა, რაც აღნიშნული საკითხი დონალდ ტრამპმა და საუდის არაბეთის ტახტის მემკვიდრემ სატელეფონო საუბრისას განიხილეს. საბოლოოდ, მხარეებმა შეთანხმებას მიაღწიეს, რის შემდეგაც სამხედრო ბაზებზე წვდომა აღდგა.
მნიშვნელოვანია ითქვას, რომ განახლებული ოპერაციის ფარგლებში კომერციული გემები სპეციალურად გაწმენდილი ვიწრო დერეფნით იმოძრავებენ. მათ უსაფრთხოებას ამერიკული სამხედრო ხომალდები და ავიაცია დაიცავს. აღსანიშნავია, რომ Project Freedom-ის საწყის ეტაპს ირანის მხრიდან მწვავე რეაქცია და არაბეთის გაერთიანებულ საამიროებზე სარაკეტო თავდასხმა მოჰყვა. თეირანმა იერიში იმ ნავთობჰაბზე მიიტანა, რომელიც ქვეყნისთვის ნედლეულის ექსპორტის ერთადერთი კრიტიკული წერტილია.