სავალუტო ფონდი უკრაინისთვის $690 მილიონს გამოყოფს
საერთაშორისო სავალუტო ფონდის აღმასრულებელ დირექტორთა საბჭომ უკრაინის დაფინანსების პროგრამის მორიგი გადახედვა დაასრულა და ქვეყნისთვის $690 მილიონის ოდენობის ტრანშის დაუყოვნებლივ გამოყოფა დაამტკიცა. როგორც ირკვევა, ორგანიზაციამ გადაწყვეტილება ეკონომიკური შეფასების საფუძველზე მიიღო.
IMF-ის განცხადებით, რუსეთის მიერ კრიტიკულ ინფრასტრუქტურაზე განხორციელებული თავდასხმებისა და ახლო აღმოსავლეთის კონფლიქტის უარყოფითი ეფექტების მიუხედავად, უკრაინამ მაკროეკონომიკური და ფინანსური სტაბილურობის შენარჩუნება შეძლო. საერთაშორისო სავალუტო ფონდის შეფასებით, იმის მიუხედავად, რომ რეფორმების განხორციელების პროცესი შეფერხდა და რამდენიმე სტრუქტურული პირობა დაგვიანებით შესრულდა მარტის ბოლოსთვის დასახული ყველა რაოდენობრივი კრიტერიუმის მიღწევა მაინც მოხერხდა.
ფონდის აღმასრულებელი დირექტორის, კრისტალინა გეორგიევას განცხადებით, უკრაინისთვის უახლოეს პერიოდში პრიორიტეტად მაკროეკონომიკური სტაბილურობის შენარჩუნება უნდა დარჩეს. მან ხელისუფლებას გონივრული ფისკალური და მონეტარული პოლიტიკის გატარებისკენ, ასევე ფინანსური სექტორის მდგრადობის დაცვისკენ მოუწოდა.
შეგახსენებთ, ომში მყოფი ქვეყანა IMF-ის $8.1-მილიარდიანი დახმარების პროგრამით სარგებლობს. ბოლო ტრანშის გამოყოფის შემდეგ უკრაინის მიერ ამ ფონდის თანხების ათვისების მაჩვენებელი $2.2 მილიარდამდე გაიზარდა.