სეს-მა თბილისში მწნილის საწარმო დახურა – გამოვლინდა კრიტიკული შეუსაბამობები

სურსათის ეროვნულმა სააგენტომ თბილისში მოქმედ მწნილის მწარმოებელ საწარმოში კრიტიკული შეუსაბამობები გამოავლინა და საწარმოო პროცესი შეაჩერა.

სააგენტოს ინფორმაციით, თბილისის დეპარტამენტის ინსპექტორებმა, სააგენტოში შესული შეტყობინების საფუძველზე, ფიზიკური პირის ჯ. შ.-ს კუთვნილი მწნილის საწარმო შეამოწმეს, რომელიც თბილისში, მეველის N30-ში მდებარეობს.

ინსპექტირების შედეგად ობიექტზე გამოვლინდა სურსათის უვნებლობის მოთხოვნების დარღვევები, მათ შორის:

• ჰიგიენური ნორმების უხეში დარღვევა; • არასათანადო რეცხვა-დეზინფექციის პროცესი; • საწარმოს ინფრასტრუქტურის გაუმართაობა.

ამასთან, სააგენტოს ცნობით, დადგინდა, რომ ბიზნესოპერატორი ეკონომიკურ საქმიანობათა რეესტრში რეგისტრაციის გარეშე საქმიანობდა. კანონმდებლობის შესაბამისად, ფიზიკური პირი დაჯარიმდა, ხოლო საწარმოო პროცესი შეჩერდა.

სურსათის ეროვნული სააგენტო ბიზნესოპერატორებს მოუწოდებს, საქმიანობა განახორციელონ სურსათის უვნებლობის კანონმდებლობისა და დადგენილი მოთხოვნების სრული დაცვით.