შავ ზღვაში ორ ნავთობტანკერზე თავდასხმის გამო, CPC-ის ტერმინალზე მუშაობა შეჩერდა

რუსეთის შავი ზღვის სანაპიროსთან მდებარე კასპიის მილსადენის კონსორციუმის ტერმინალზე ორ ნავთობტანკერზე თავდასხმა მოხდა. კონსორციუმის განცხადებით, ინციდენტის გამო ნავთობის ჩატვირთვის პროცესი დროებით შეჩერებულია.

უწყების ცნობით, თავდასხმა ტანკერებზე ASIA-სა და NISSOS IOS-ზე მაშინ განხორციელდა, როდესაც ნავთობის ჩატვირთვა მიმდინარეობდა. ტანკერ ASIA-ზე ხანძარი გაჩნდა, თუმცა მისი ჩაქრობა მალევე მოხერხდა.

„კონსორციუმის თანამშრომლებსა თუ კონტრაქტორებს შორის დაშავებულები ან დაღუპულები არ არიან. ნავთობის დაღვრა არ მომხდარა“, - აცხადებენ CPC-ში და აღნიშნავენ, რომ ორივე გემმა შეძლო წყალზე გაჩერება.

კონსორციუმს არ დაუკონკრეტებია, თუ რომელი მხარეა პასუხისმგებელი მომხდარზე. აღსანიშნავია, რომ ბოლო კვირის განმავლობაში შავ და აზოვის ზღვებში გემებზე თავდასხმები როგორც რუსეთის, ისე უკრაინის მხრიდან მკვეთრად გახშირდა.

CPC არის 1 510 კილომეტრის სიგრძის ნავთობსადენი, რომელიც ყაზახეთის კასპიის ზღვის ნავთობის საბადოებს რუსეთის შავი ზღვის პორტ ნოვოროსიისკთან აკავშირებს. ნოვოროსიისკში ჩატვირთული ნავთობი ტანკერებით მსოფლიო ბაზარზე გადის. აღნიშნულ მარშრუტზე ყაზახეთის ნავთობის ექსპორტის დაახლოებით 80% მოდის.