სომხეთი რუსეთის წინააღმდეგ სანქციების დაწესებას არ გეგმავს - ფაშინიანი

სომხეთის პრემიერ-მინისტრმა, ნიკოლ ფაშინიანმა ჟურნალისტებთან საუბრისას განაცხადა, რომ ერევანი რუსეთის წინააღმდეგ სანქციების რეჟიმს არ შეუერთდება.

როგორც ირკვევა, ქვეყნის მთავრობა ცდილობს შეინარჩუნოს ბალანსი საერთაშორისო ვალდებულებებსა და ეროვნულ ეკონომიკურ ინტერესებს შორის. პოლიტიკოსის განმარტებით, სომხეთი არ გადადგამს ისეთ ნაბიჯებს, რომლებიც თავად ქვეყანას დააყენებს სანქციების ქვეშ მოქცევის საფრთხის წინაშე.

მნიშვნელოვანია ითქვას, რომ აღნიშნულ საკითხზე მანამდე კომენტარი რუსეთის უშიშროების საბჭოს მდივანმა, სერგეი შოიგუმ გააკეთა. მისი თქმით, ევროკავშირში გაწევრიანების შემთხვევაში, ერევანი იძულებული გახდება რუსეთს სანქციები დაუწესოს, რაც ევრაზიული ეკონომიკური კავშირის ფარგლებში არსებული პრივილეგიების დაკარგვას გამოიწვევს.

პარალელურად, ევროკომისიის პრეზიდენტმა, ურსულა ფონ დერ ლაიენმა აპრილში აღნიშნა, რომ ევროკავშირი მიესალმება სომხეთის ძალისხმევას რუსეთისთვის დაწესებული შეზღუდვების გვერდის ავლის პრევენციის მიმართულებით.