სომხეთს სუვერენიტეტის და დამოუკიდებლობის პომიდორზე გაცვლა არ შეუძლია - ეკონომიკის მინისტრი

სომხეთის ეკონომიკის მინისტრის განცხადებით, ქვეყანას სუვერენიტეტის, დამოუკიდებლობის ან ტერიტორიული მთლიანობის პომიდვრის ექსპორტზე გადაცვლა არ შეუძლია. ამის შესახებ გევორქ პაპოიანმა CivilNet-თან ინტერვიუში, რუსეთის მიერ სომხური სოფლის მეურნეობის პროდუქტების იმპორტზე ახალი შეზღუდვების დაწესების ფონზე, მთავრობის პროევროპული კურსის დაცვისას ისაუბრა.

მან აღნიშნა, რომ მნიშვნელოვან ეკონომიკურ მოსაზრებებს თავისი საზღვრები აქვთ, როდესაც საქმე სახელმწიფოებრიობას ეხება.

„რისკები, რა თქმა უნდა, არსებობს, მაგრამ ამ რისკებს აქვს ზღვარი - ქვეყნის დამოუკიდებლობა, სუვერენიტეტი და ტერიტორიული მთლიანობა. არის რაღაცები, რის გვერდზე გადადებაც და წინ სვლა უბრალოდ შეუძლებელია“, - განაცხადა სომხეთის

სომხურ ექსპორტზე რუსეთის შეზღუდვებზე საუბრისას, პაპოიანმა პარალელი გაავლო ეკონომიკურ ინტერესებსა და ეროვნულ სუვერენიტეტს შორის: „საბოლოო ჯამში, როდესაც სახელმწიფოს ინტერესებს ავწონ-დავწონით, ჩვენ არ შეგვიძლია ყველაფერი პომიდორზე გავცვალოთ“.

ცნობისთვის, რუსეთის მომხმარებელთა უფლებების დაცვის უწყებამ, „როსპოტრებნადზორმა“, 30 მაისიდან სომხური ხილისა და ბოსტნეულის იმპორტი შეზღუდა. ამას წინ სომხურ ყვავილებზე, მინერალურ წყალ „ჯერმუკზე“, გარკვეულ ალკოჰოლურ სასმელებსა და სხვა საქონელზე შეზღუდვები უძღოდა და ეს ზომები ერევანსა და მოსკოვს შორის პოლიტიკური დაძაბულობის ზრდას დაემთხვა.

CivilNet წერს, რომ რუსეთი ღიად აკრიტიკებს სომხეთის მიერ იმ კანონმდებლობის მიღებას, რომელიც მხარს უჭერს ევროკავშირში გაწევრიანების პერსპექტივას, მაშინ როდესაც ზოგიერთი სომეხი კომენტატორი სავაჭრო შეზღუდვებს განიხილავს, როგორც რუსეთის უფრო ფართო ზეწოლის ნაწილს სომხეთში 7 ივნისს დაგეგმილი საპარლამენტო არჩევნების წინ.