სუბსიდირებული იპოთეკური სესხი, ₾118-ათასიანი ხელფასი - რა ქონებას ფლობს „ოცნების“ დეპუტატი?

„ქართული ოცნების“ პარლამენტის წევრმა მარიამ ლაშხმა 2025 წელს დეპუტატად მუშაობისთვის ხელფასის სახით 118 312 ლარი აიღო, ხოლო ბიზნესისა და ტექნოლოგიების უნივერსიტეტში ასოცირებული პროფესორის პოზიციაზე 2051 ლარი. მმართველი პარტიის წევრის მიერ შევსებული დეკლარაციიდან ირკვევა.

დოკუმენტის მიხედვით, მისი ქმარი ალექსანდრე ნეფარიძე 2025 წლის იანვრიდან ივნისის ჩათვლით პაშა ბანკის კონსულტანტი იყო, რისთვისაც 18 331 ლარის ხელფასი აიღო. 30 ნოემბრიდან დეკემბრის განმავლობაში კი საქართველოს მუნიციპალური განვითარების ფონდში პროექტის მენეჯერის პოზიციაზე 6 753 ლარის ხელფასი დაერიცხა.

უძრავი ქონების გრაფაში „ოცნების“ დეპუტატი მხოლოდ 2024 წელს ნაჩუქარ 989 კვ.მ-ის მიწის ნაკვეთს უთითებს, რომელიც საგურამოში მდებარეობს და მასზე ერთი შენობა ნაგებობაა. მარიამ ლაშხის სახელზეა 2015 წელს ნაყიდი მსუბუქი ავტომობილი Hyundai ix35, მის ქმარს ალექსანდრე ნეფარიძეს კი 2021 წელს 12 300 დოლარად შეძენილი Toyota Rav4 ჰყავს.

საპარლამენტო უმრავლესობის წევრმა 2023 წელს სახელმწიფო სუბსიდირების პროგრამით ისარგებლა და „ლიბერთი ბანკიდან“ 199 500 ლარიანი იპოთეკური სესხი გამოიტანა, რომელსაც 2043 წლამდე უნდა მოემსახუროს. 2025 წელს ამ სესხის მომსახურებით მას 28 310 ლარის გასავალი ჰქონდა. თუმცა რა ქონება იყიდა ამ თანხით დეკლარაციაში მითითებული არ არის. უნდა აღინიშნოს, რომ დეპუტატ მარიამ ლაშხს 2022 წელს მეორე შვილი შეეძინა. სახელმწიფო იპოთეკური სესხის სუბსიდირებისთვის 1 წლამდე შვილის ყოლაა აუცილებელი.

მისმა ქმარმა ალექსანდრე ნეფარიძემ კი 2022 წელს 20 500-ლარიანი ლიზინგი გააკეთა.

მარიამ ლაშხს ტერაბანკში 10 000-დოლარიანი ვადიანი ანაბარი აქვს, რომელზედაც გასულ წელს სარგებლის სახით 900 დოლარი დაერიცხა.

ცნობისთვის, საერთაშორისო ურთიერთობებში სოციალურ მეცნიერებათა მაგისტრი "ქართული ოცნების" პარტიული სიით საკანონმდებლო ორგანოში 2020 წლიდან მუშაობს. ის იყო X მოწვევის, და ახლა უკვე XI მოწვევის პარლამენტის წევრი.