თბილისის სატრანსპორტო კომპანიამ მეტროს ესკალატორების ნაწილებისთვის ₾8-მილიონიანი ტენდერი გამოაცხადა
თბილისის სატრანსპორტო კომპანიამ მეტროს სათადარიგო ნაწილების შესასყიდად, 8 მილიონი ლარის ღირებულების ტენდერი გამოაცხადა. შესყიდვა შეეხება საფეხურების კარკასს, რეზინის სახელურებს, წევის ჯაჭვებს და სრულ ტექნიკურ კომპლექტაციას, რაც თბილისის მეტროპოლიტენის ესკალატორის სტანდარტებს შეესაბამება.
მომწოდებლებმა დოკუმენტურად უნდა დაადასტურონ, რომ მათი სათადარიგო ნაწილები LT-3 ტიპის ესკალატორის სტანდარტებს შეესაბამება.
"საგარანტიო პირობებში მოცემული უნდა იყოს: ნახაზების და ტექნიკური პირობების ნომრები, რომელთა მიხედვით დამზადდება წევის ჯაჭვები, დანადგარის ტიპი, რომლითაც ჩატარდება ჯაჭვის შემადგენელი ნაწილების შემოწმება-გამოცდა, ჯაჭვების საექსპლუატაციო საგარანტიო ვადები, შესაბამისი ტექნიკური პირობების მოთხოვნების შესაბამისად. აღნიშნული დოკუმენტი გაცემული უნდა იყოს შემოთავაზებული საქონლის მწარმოებელი კომპანიის მიერ," - ნათქვამია სატენდერო დოკუმენტაციაში.
კომპანიებმა საკუთარი წინადადებები 10 აგვისტოს ჩათვლით უნდა წარადგინონ.
BM.GE
წყარო: bm.ge