თბილისის უძრავი ქონების ბაზრის ბრუნვამ $2.5 მილიარდს მიაღწია - ვინ ყიდულობს ბინებს დედაქალაქში?

2026 წლის პირველ შვიდ თვეში თბილისში გაყიდული ბინების ჯამურმა ღირებულებამ 2.45 მილიარდი აშშ დოლარი შეადგინა, რაც 27.3%-ით აღემატება წინა წლის ანალოგიურ მაჩვენებელს ($1.92 მლრდ) - საინვესტიციო ბანკმა Galt & Taggart-მა თბილისის საცხოვრებელი უძრავი ქონების ბაზრის 2026 წლის ივლისის მიმოხილვა გამოაქვეყნა.

კვლევის მიხედვით, მხოლოდ ივლისში 4,475 ბინა გაიყიდა. პუბლიკაციაში აღნიშნულია, რომ განსაკუთრებით გააქტიურებულია დეველოპერებისგან ბინების პირდაპირი შესყიდვა - 7 თვეში დეველოპერებმა 6,930 ბინა გაყიდეს, რაც წლიურად 30%-იანი ზრდაა.

მყიდველთა გეოგრაფია: იზრდება ისრაელისა და სხვა ქვეყნების მოქალაქეების წილი

Galt & Taggart-ის მონაცემები აჩვენებს, რომ ადგილობრივი მყიდველების წილი ბაზარზე მცირდება, ხოლო უცხოელების ინტერესი იზრდება. 2026 წლის 7 თვის მონაცემებით:

• საქართველოს მოქალაქეები: ბაზრის 74%-ს იკავებენ (შედარებისთვის, 2023 წელს ეს მაჩვენებელი 85% იყო). • ისრაელი: მყიდველთა 11% ისრაელის მოქალაქეა, რაც სტაბილურად მაღალი მაჩვენებელია. • რუსეთი: წილი 4%-მდე გაიზარდა (2025 წელს 3% იყო). • სხვა ქვეყნები: მნიშვნელოვნად გაიზარდა სხვა უცხოელების წილი და 11% შეადგინა.

მიწოდება: სად გაიცა ყველაზე მეტი სამშენებლო ნებართვა?

2026 წლის 7 თვეში თბილისში სულ 1 მილიონი კვ.მ. საცხოვრებელი ფართობის მშენებლობის ნებართვა გაიცა.

განსაკუთრებული აქტივობით გამოირჩევა ივნისი და ივლისი. უბნების მიხედვით, მშენებლობების "ცხელი წერტილები" შემდეგნაირად განაწილდა:

• დიდი დიღომი: 186 ათასი კვ.მ. • ნაძალადევი: 175 ათასი კვ.მ. • საბურთალო: 139 ათასი კვ.მ.

ფასები და სეგმენტები: "ბიუჯეტური" ბინები ქრება

ბაზარზე ყველაზე მოთხოვნადი კვლავ საშუალო ზომის (51-80 კვ.მ) ბინებია, რომლებზეც გაყიდვების 53.8% მოდის. პატარა ზომის (35-50 კვ.მ) ბინების წილი კი მცირედით შემცირდა და 24.6% შეადგინა.

რაც შეეხება საფასო სეგმენტებს, "ბიუჯეტური" ბინების ხელმისაწვდომობა მკვეთრად იკლებს:

• ბიუჯეტური სეგმენტი (<$1,100/კვ.მ): მათი წილი ბაზარზე 68.8%-დან (2024 წ.) 49.5%-მდე შემცირდა. • საშუალო სეგმენტი ($1,101 - $2,000): ამ კატეგორიის წილი თითქმის გაორმაგდა და 42.9% შეადგინა. • პრემიუმ სეგმენტი (>$3,000): ბაზრის მცირე, თუმცა მზარდ 1.6%-ს იკავებს.