"ტერაბანკის" შეძენით სომხეთის ერთ-ერთი უმსხვილესი Ardshinbank-ი არის დაინტერესებული - ეროვნული ბანკი

"ტერაბანკის" შეძენით სომხეთის ერთ-ერთი უმსხვილესი Ardshinbank-ი არის დაინტერესებული - აღნიშნული Bm.ge-ის ეროვნული ბანკის პრესსამსახურში დაუდასტურეს. დღეს "TV პირველმა" გაავრცელა ინფორმაცია, რომლის თანახმადაც, სომეხი ბიზნესმენის, კარენ საფარიანის ბიზნესჯგუფი - Arins Group-ი საქართველოში "ტერაბანკის" და ასევე, რუსთაველის გამზირზე მდებარე სასტუმრო "ბილტმორის" შესყიდვას გეგმავს. აღნიშნული აქტივები ამჟამად არაბთა გაერთიანებული საამიროების სამეფო ოჯახის წევრის, შეიხ ნაჰაიან მაბარაკ ალ ნაჰაიანის საკუთრებაშია.

BM.GE-მ აღნიშნულ საკითხთან დაკავშირებით საქართველოს ეროვნულ ბანკს კითხვებით მიმართა, სადაც გვიპასუხეს:

"სს „ტერაბანკით“ სომხეთის ერთ-ერთი უმსხვილესი Ardshinbank-ის დაინტერესების შესახებ ცნობილია საქართველოს ეროვნული ბანკისთვის, თუმცა ამ ეტაპზე კომპანიას ოფიციალურად მარეგულირებლისთვის არ მოუმართავს. შეგახსენებთ, რომ კომერციული ბანკების შესახებ კანონის თანახმად, ბანკის მნიშნველოვანი წილის გასხვისებისთვის აუცილებელია სებ-ის თანხმობა. შესაბამისად, ეროვნული ბანკი თავისი მანდატიდან გამომდინარე შეისწავლის და მიღებს გადაწყვეტილებას მოქმედი კანონმდებლობის შესაბამისად.

ინფორმაციისთვის, Ardshinbank სომხეთის უმსხვილესი და სისტემურად მნიშვნელოვანი უნივერსალური ბანკია, რომელსაც 2025 წლის მდგომარეობით ბაზრის 20.6%-იან წილი უკავია. ეს პოზიცია Ardshinbank სომხეთის №1 ბანკად აქცევს აქტივების, დეპოზიტების, კაპიტალის, საცალო დეპოზიტების, წმინდა მოგებისა და ფილიალების ქსელის მიხედვით.

ბანკის მაკონტროლებელი აქციონერია "Arins Group" LLC, რომელიც ფლობს ბანკის აქციების 98.918067%-ს. ბანკის ბენეფიციარი მესაკუთრეა კარენ საფარიანი - "Arins Group" LLC-ის ერთადერთი მეწილე", - განუცხადეს BMG-ის ეროვნული ბანკის პრესსამსახურში.

"ტერაბანკი" საქართველოში აქტივების ზომით რიგით მეექვსე უმსხვილესი ბანკია და მისი ჯამური აქტივები 2026 წლის ივლისის მდგომარეობით 2.27 მილიარდ ლარს შეადგენს. ბანკის საკრედიტო პორტფელის ზომა 1.72 მილიარდ ლარს შეადგენს. ბანკს 2026 წლის პირველ შვიდ თვეში 18 მილიონი ლარის მოგება ჰქონდა.