ტრამპი ირანს ხიდებისა და ელექტროსადგურების განადგურებით ემუქრება

აშშ-ის პრეზიდენტმა დონალდ ტრამპმა ირანი სამხედრო დარტყმებით კიდევ ერთხელ გააფრთხილა და განაცხადა, რომ თეირანის მიერ მოლაპარაკებების მაგიდასთან დაბრუნებაზე უარის თქმის შემთხვევაში, ამერიკული ავიაცია ქვეყნის ენერგეტიკულ ინფრასტრუქტურასა და ხიდებს გაანადგურებს.

Fox News-თან ინტერვიუში ტრამპმა აღნიშნა, რომ ირანულ მხარესთან მოლაპარაკებების განახლების მიზნით, ვაშინგტონმა თეირანს შესაბამისი გზავნილი უკვე გადასცა. მისივე თქმით, თუ ირანი შეთანხმებაზე წასვლას არ ისურვებს, ქვეყანაში სამოქალაქო ინფრასტრუქტურა აღარ იარსებებს.

ტრამპის ამ მუქარას გაეროს ადამიანის უფლებათა უმაღლესი კომისარი ფოლკერ თიურკი გამოეხმაურა და აღნიშნა, რომ საერთაშორისო სამართლით, სამოქალაქო ობიექტებზე მიზანმიმართული თავდასხმა ომის დანაშაულს წარმოადგენს.

მნიშვნელოვანია ითქვას, რომ სამხედრო დაპირისპირების განახლებასთან ერთად, აშშ-ის პრეზიდენტმა ჰორმუზის სრუტეში ტრანზიტისთვის დაგეგმილი 20%-იანი გადასახადის იდეა გააუქმა. ტრამპის განმარტებით, ამ მოსაკრებელს სპარსეთის ყურის არაბულ ქვეყნებთან დაგეგმილი მასშტაბური სავაჭრო და საინვესტიციო ხელშეკრულებები ჩაანაცვლებს. ამ გადაწყვეტილების მიუხედავად, თეირანი აცხადებს, რომ აშშ-ის მიერ დაწესებული ეკონომიკური ბლოკადა მოლაპარაკებების პროცესს საბოლოოდ აფერხებს.