ტრამპის არალეგალური ტარიფების გამო, აშშ-ის მთავრობა $81 მილიარდს უკან აბრუნებს

აშშ-ის მთავრობამ იმ ტარიფების სახით მიღებული ათობით მილიარდი დოლარი უკან დააბრუნა, რომლებიც უზენაესმა სასამართლომ არალეგალურად მიიჩნია. როგორც ირკვევა, მიმდინარე ფისკალური წლის განმავლობაში, რომელიც 2025 წლის ოქტომბერში დაიწყო, ბიუჯეტიდან კომპენსაციის სახით $81 მილიარდი გაიცა, მაშინ როდესაც გასული წლის ანალოგიურ პერიოდში ეს მაჩვენებელი მხოლოდ $5 მილიარდს შეადგენდა.

აშშ-ის ფინანსთა სამინისტროს ოფიციალური წარმომადგენლის განმარტებით, აღნიშნული მკვეთრი ზრდა თითქმის სრულად უკავშირდება სასამართლოს გადაწყვეტილებას, თანხების ძირითადი ნაწილი კი კომპანიებმა მაისსა და ივნისში დაიბრუნეს.

შეგახსენებთ, რომ მიმდინარე წლის თებერვალში აშშ-ის უზენაესმა სასამართლომ დონალდ ტრამპის მიერ დაწესებული გლობალური ტარიფების მნიშვნელოვანი ნაწილი გააუქმა, რამაც სახელმწიფო იმპორტიორი კომპანიებისთვის თანხების დაბრუნების ვალდებულების წინაშე დააყენა.

მნიშვნელოვანია ითქვას, რომ აღნიშნულმა პროცესმა ამერიკის ბიუჯეტის დეფიციტი კვლავ გაზარდა. თუ გასულ წელს ტარიფებიდან მიღებული შემოსავლების წყალობით დეფიციტის შემცირება მოხერხდა, ამჯერად, ფისკალური წლის პირველ ცხრა თვეში, მაჩვენებელმა $1.36 ტრილიონი შეადგინა, რაც წინა წელთან შედარებით 2%-იან ზრდაზე მიუთითებს. პარალელურად, სახელმწიფოს საგარეო ვალის მომსახურების ხარჯები 14%-ით გაიზარდა და $1 ტრილიონს გადააჭარბა, ხოლო ახლო აღმოსავლეთში მიმდინარე ომის გამო სამხედრო ხარჯების მაჩვენებელმა 5%-ით მოიმატა.