ტრამპის „მშვიდობის საბჭოს“ ფონდში თანხები არ ჩარიცხულა - რატომ ვერ იღებს საბჭო დაპირებულ მილიარდებს

აშშ-ის პრეზიდენტის, დონალდ ტრამპის ე.წ. „მშვიდობის საბჭოს“ (Board of Peace) მიერ შექმნილ ღაზის სექტორის აღდგენის ფონდს, დაარსებიდან ოთხი თვის შემდეგაც კი, დონორი ქვეყნების მიერ დაპირებული მილიარდობით დოლარიდან ჯერჯერობით არცერთი ცენტი არ მიუღია. ინფორმაციას ამის შესახებ სააგენტო AFP-ი საბჭოსთან დაახლოებულ ანონიმურ წყაროზე დაყრდნობით ავრცელებს.

ტრამპის ჩანაფიქრით, აღნიშნულ საბჭოს ღაზის სექტორი უნდა აღედგინა, სადაც ისრაელი და ჰამასი გასული წლის ოქტომბერში, აშშ-ის მხარდაჭერით, ცეცხლის შეწყვეტაზე შეთანხმდნენ, რათა ორწლიანი დამანგრეველი ომი შეეჩერებინათ. თუმცა, ტრამპის ინიციატივამ თავიდანვე გამოიწვია გაკვირვება, რადგან მან საბჭოში გაწევრიანების ფართო მიწვევები გააგზავნა, მათ შორის რუსეთის პრეზიდენტ ვლადიმერ პუტინთან და ისეთ ქვეყნებთან, რომლებიც შორეულ აღმოსავლეთში მიმდინარე ტრადიციული დიპლომატიისგან ძალიან შორს დგანან.

საბჭოს შექმნის დღიდან ფონდში, რომელსაც მსოფლიო ბანკი მართავს და გაერო უჭერს მხარს, დონორებს ფული არ შეუტანიათ. წყაროს განმარტებით, თანხები ანგარიშზე იმიტომ არ ჩარიცხულა, რომ ფონდი თავიდანვე გათვლილი იყო „რეკონსტრუქციისა და განვითარების ფაზისთვის“, ამ ეტაპისთვის კი მხარეებს ჯერ არ მიუღწევიათ.

ცეცხლის შეწყვეტის შეთანხმების მიუხედავად, ისრაელის სამხედრო ოპერაციები ღაზის სექტორში კვლავ გრძელდება. ადგილობრივი ჯანდაცვის სამინისტროს მონაცემებით, ზავის გაფორმების შემდეგ რეგიონში სულ მცირე 910 ადამიანი დაიღუპა. ისრაელი ამ დრომდე აკონტროლებს და ოკუპირებული აქვს განადგურებული ღაზის სექტორის 60%-ზე მეტი, მათ შორის ყველა შესასვლელი და გამოსასვლელი პუნქტი.

პარალელურად, გამოცემა Financial Times-მა საბჭოს სპიკერზე დაყრდნობით გაავრცელა ინფორმაცია, რომ საბჭომ შემოწირულებები პირდაპირ JPMorgan-ის საბანკო ანგარიშზე მიიღო. თუმცა, როგორც FT აღნიშნავს, ამ კონკრეტული ანგარიშისთვის არანაირი „დამოუკიდებელი გამჭვირვალობის მოთხოვნები“ არ არსებობს, რაც კითხვებს აჩენს ფინანსების კონტროლთან დაკავშირებით.

ევროპის წამყვანმა სახელმწიფოებმა ბოიკოტი გამოუცხადეს აღნიშნულ საბჭოს. მის შემადგენლობაში ძირითადად შედიან ახლო აღმოსავლეთში აშშ-ის ძველი პარტნიორები, ტრამპის იდეოლოგიური მოკავშირეები და პატარა ქვეყნები, რომლებიც აშშ-ის პრეზიდენტის ყურადღების მიქცევას ცდილობენ. გაწევრიანებაზე უარი თქვეს საფრანგეთმა და დიდმა ბრიტანეთმა. საბჭოს ცალსახად ლიდერობს არა მხოლოდ ამერიკის შეერთებული შტატები, არამედ პერსონალურად დონალდ ტრამპი, რომელსაც ეკუთვნის საბოლოო სიტყვა და შეუძლია ხელმძღვანელის პოსტი საპრეზიდენტო ვადის ამოწურვის შემდეგაც შეინარჩუნოს.

მანამდე ტრამპმა განაცხადა, რომ აშშ საბჭოში 10 მილიარდ დოლარს შეიტანდა, ხოლო კატარმა, საუდის არაბეთმა და არაბთა გაერთიანებულმა საამიროებმა თითომ მინიმუმ 1 მილიარდი დოლარის გამოყოფის პირობა დადეს. საბჭოს წესდების თანახმად, მუდმივი ადგილის მისაღებად წევრმა ქვეყნებმა 1 მილიარდი დოლარი უნდა გადაიხადონ.

გაეროსა და ევროკავშირის ერთობლივი შეფასებით, რომელიც აპრილში გამოქვეყნდა, მომავალი ათწლეულის განმავლობაში ომით განადგურებული ღაზის სექტორის აღსადგენად 71 მილიარდ დოლარზე მეტი იქნება საჭირო. გაეროს განცხადებით, რეგიონში ჰუმანიტარული ვითარება ამ დრომდე კრიტიკულია.