ტრამპის ტარიფებმა ევროპულ ავტოინდუსტრიას €8 მილიარდის ზარალი მოუტანა

დონალდ ტრამპის ადმინისტრაციის მიერ შემოღებული სავაჭრო შეზღუდვების შედეგად, ევროპულმა ავტომწარმოებლებმა €8 მილიარდზე მეტი დაკარგეს.

Financial Times-ის მონაცემებსა და Volkswagen-ის, BMW-ს, Mercedes-Benz-ის, Stellantis-ისა და Volvo Cars-ის ხელმძღვანელთა საჯარო განცხადებებზე დაყრდნობით ირკვევა, რომ აშშ-ის სავაჭრო პოლიტიკამ კომპანიებზე მნიშვნელოვანი ფინანსური ზეწოლა მოახდინა. არსებული ინფორმაციით, ყველაზე დიდი ზარალი BMW-მ განიცადა, რომლის ფინანსურმა დანაკარგმა €2.1 მილიარდი შეადგინა. Mercedes-Benz-ის ზარალი €1.3 მილიარდით, Stellantis-ისა კი €1.2 მილიარდით განისაზღვრა.

ფინანსური დანაკარგები გასული წლის აპრილში მიღებულ გადაწყვეტილებას უკავშირდება, როდესაც ამერიკის შეერთებულმა შტატებმა ევროპული წარმოების ავტომობილებზე ტარიფები 2.5%-დან 27.5%-მდე გაზარდა. მართალია, აგვისტოში მიღწეული სავაჭრო შეთანხმების საფუძველზე განაკვეთი 15%-მდე შემცირდა, თუმცა კომპანიები ადრეული შეფერხებებისა და ბაზარზე არსებული გაურკვევლობის გამო სოლიდურ ზარალს მაინც აფიქსირებენ.

ამასთან, 2026 წლის 1 მაისს დონალდ ტრამპმა ბრიუსელი სავაჭრო შეთანხმების პირობების დარღვევაში დაადანაშაულა. პრეზიდენტი ევროკავშირიდან იმპორტირებულ მსუბუქ და სატვირთო ავტომობილებზე ტარიფების 25%-მდე გაზრდით იმუქრება. ევროკომისიაში აცხადებენ, რომ გაერთიანება ნაკისრ ვალდებულებებს ასრულებს, თუმცა საკუთარი ინტერესების დასაცავად საპასუხო ზომების მიღებას მაინც გეგმავს.

ცნობისთვის, ტრამპის ადმინისტრაცია მსგავს შეზღუდვებს ადგილობრივი წარმოების წახალისებისა და სავაჭრო დეფიციტის შემცირების მიზნით იყენებს. ევროპული ავტომწარმოებლებისთვის ამერიკული ბაზარი ერთ-ერთ საკვანძო მიმართულებას წარმოადგენს, რაც სავაჭრო დავის გამწვავების შემთხვევაში მათ მდგომარეობას კიდევ უფრო დაამძიმებს.