ტრამპის თქმით, ის კევინ უორშის გადაწყვეტილებაში არ ჩაერევა

პრეზიდენტმა დონალდ ტრამპმა ქვეყნის ცენტრალურ ბანკთან მიმართებით რიტორიკა შეცვალა და აღნიშნა, რომ ფედერალური რეზერვის ახალ ხელმძღვანელს, კევინ უორშს სრულ თავისუფლებას მისცემს.

პრეზიდენტმა პოზიცია გამოცემა Washington Examiner-თან ინტერვიუში დააფიქსირა და ის მნიშვნელოვან ცვლილებას წარმოადგენს აქამდე არსებულ პოზიციასთან შედარებით, რადგან, მოგეხსენებათ, ტრამპი აქტიურ ზეწოლას ახორციელებდა FED-ის ყოფილ ხელმძღვანელ ჯერომ პაუელზე და მას განაკვეთის შემცირებას აიძულებდა, თუმცა უშედეგოდ.

თავად დონალდ ტრამპის პასუხი მოჰყვა კითხვას იმის შესახებ, შეამცირებს თუ არა კევინ უორში საპროცენტო განაკვეთებს. აღნიშნული საკითხი განსაკუთრებით აქტუალურია იმის გათვალისწინებით, რომ ფინანსური ბაზრები ამჟამად განაკვეთის შესაძლო ზრდას უფრო პროგნოზირებენ, ვიდრე შემცირებას.

ამასთან, კევინ უორშმა სენატის საბანკო კომიტეტის წინაშე განაცხადა, რომ მას თეთრი სახლისთვის საპროცენტო განაკვეთების შემცირების პირობა არ მიუცია. FED-ის ახალმა თავმჯდომარემ ხაზგასმით აღნიშნა, რომ პრეზიდენტს მისთვის კონკრეტული მონეტარული გადაწყვეტილების მიღება არასდროს უთხოვია და უწყება მონეტარულ პოლიტიკას დამოუკიდებლად გაატარებს.