წარმომადგენელთა პალატამ ლინდსი გრემის სანქციების კანონპროექტს მხარი დაუჭირა

კონგრესის წარმომადგენელთა პალატამ მხარი დაუჭირა კანონპროექტს „ლინდსი გრემის რუსეთისა და ირანის სანქცირების 2026 წლის აქტი“.

კანონპროექტით, სანქციების მთავარი სამიზნე რუსეთია, თუმცა მეორადი სანქციები ასევე გავრცელდება ჩინეთსა და ინდოეთზე, რომლებიც რუსული ნავთობის ყველაზე მსხვილი შემსყიდველები არიან, ასევე ირანზე რუსეთისთვის სამხედრო დახმარებისთვის მათ შორის, საუბარია დრონებისა და ბალისტიკურ რაკეტების მიწოდებაზე, რომელსაც შემდეგ რუსეთი უკრაინის წინააღმდეგ იყენებს.

კერძოდ, კანონპროექტი გულისხმობს რუსეთის მთავრობის წევრების სანქცირებას, მათ შორის პრეზიდენტ ვლადიმერ პუტინის, ის ასევე ვრცელდება ოლიგარქებსა და სახელმწიფო საწარმოებზე. გარდა ამისა, პროექტი აწესებს 100%-მდე ტარიფს რუსული ნავთობის მსხვილ შემსყიდველ ქვეყნებზე, მათ შორის ჩინეთსა და ინდოეთზე.

წარმომადგენელთა პალატაში კანონპროექტს მხარი 262-მა კანონმდებელმა დაუჭირა, 159-მა კი წინააღმდეგ მისცა ხმა. პროცედურის მიხედვით, დოკუმენტი აშშ-ის პრეზიდენტ დონალდ ტრამპს ხელმოსაწერად გადაეგზავნება.

კანონპროექტის ავტორი ლინდსი გრემი ერთ-ერთ ყველაზე გავლენიან რესპუბლიკელ სენატორად და უკრაინის დიდ მხარდაჭერად ითვლებოდა, რომელიც რუსეთის წინააღმდეგ მკაცრი სანქციების დაწესებას უჭერდა მხარს. სწორედ მის პატივსაცემად ეწოდა კანონპროექტს მისი სახელი.