"თუ ირანი პირობებს არ დათანხმდება, ის ძლიერად დაიბომბება" – ტრამპი

პრეზიდენტმა დონალდ ტრამპმა განაცხადა, რომ თუ თეირანი სამშვიდობო შეთანხმების პირობებს არ დათანხმდება, ირანის დაბომბვა ბევრად უფრო მაღალი ინტენსივობით განხორციელდება.

"თუ ირანი დათანხმდება სამშვიდობო შეთანხმების პირობებს, რაც დიდი დაშვებაა, მაშინ უკვე ლეგენდად ქცეული “ეპიკური რისხვა” დასრულდება, ხოლო მეტად ეფექტური ბლოკადა უზრუნველყოფს, რომ ჰორმუზის სრუტე გახსნილი იყოს ყველასთვის, მათ შორის ირანისთვისაც. თუ ისინი არ დათანხმდებიან, დაიწყება დაბომბვა და სამწუხაროდ, ბევრად უფრო მაღალი სიძლიერითა და ინტენსივობით განხორციელდება, ვიდრე მანამდე იყო" – აცხადებს ამერიკის პრეზიდენტი.

თეთრი სახლის ლიდერის განმარტებით, მხარეებს შორის შეთანხმების მიღწევა ოპერაცია „ეპიკურ რისხვას“ დაასრულებს, ხოლო მოქმედი ბლოკადა ჰორმუზის სრუტის ყველა მხარისთვის, მათ შორის ირანისთვის მოიხსნება.

როგორც ცნობილია, მხარეებს შორის მოლაპარაკებების პროცესი გადამწყვეტ ფაზაში შევიდა, რასაც Axios-ის მიერ გავრცელებული ინფორმაციაც ადასტურებს. გამოცემის ცნობით, ვაშინგტონი თეირანისგან რამდენიმე საკვანძო პუნქტზე პასუხს უახლოესი 48 საათის განმავლობაში ელოდება, რაც ერთგვერდიანი მემორანდუმის საფუძველი უნდა გახდეს. პარალელურად, ირანის საგარეო საქმეთა სამინისტროში განმარტეს, რომ ამჟამად აშშ-ის მიერ შეთავაზებულ 14-პუნქტიან სამშვიდობო გეგმას აფასებენ.

სამშვიდობო შეთანხმების შესაძლებლობაზე ინფორმაციის გავრცელებამ გავლენა გლობალურ ბაზრებზეც იქონია. ნავთობის ფასი მკვეთრად შემცირდა, ხოლო ამერიკულმა ფიუჩერსებმა, ევროპულმა აქციებმა და სახელმწიფო ობლიგაციებმა ზრდა დააფიქსირეს.

არსებული ვითარების ფონზე, პაკისტანის მთავრობის წარმომადგენელმა აღნიშნა, რომ ომის დასრულების შესახებ წინადადების წარდგენა უახლოეს დღეებში მოსალოდნელია.