ტურიზმის ადმინისტრაცია ყაზახეთსა და უზბეკეთში საქართველოს პოპულარიზაციაში თითქმის 300 000 დოლარს დახარჯავს

ტურიზმის ეროვნულმა ადმინისტრაციამ ყაზახეთსა და უზბეკეთში საქართველოს, როგორც ტურისტული მიმართულების, პოპულარიზაციისა და ცნობადობის ამაღლების მიზნით ყაზახურ კომპანიას 299 625 დოლარის ხელშეკრულება გაუფორმა. Remark Digital Agency LLP-თან 15 ივლისს გაფორმდა ხელშეკრულება და 2027 წლის 31 იანვრამდე იქნება მოქმედი, თუმცა უშუალოდ მარკეტინგული ღონისძიებები ივლის-ოქტომბერში არის დაგეგმილი.

სარეკლამო კამპანია მოიცავს აქტივობების ფართო სპექტრს, მათ შორის:

• B2B ღონისძიებები: ალმათიში "Georgia Travel Marketplace"-ის და ტაშკენტში "Georgia Air & Tourism Forum"-ის ორგანიზება, სადაც გაიმართება შეხვედრები ტურ-ოპერატორებთან, ავიაკომპანიებთან და ინდუსტრიის წარმომადგენლებთან. • მედიის წარმომადგენლების, ბლოგერების/ინფლუენსერებისა და ტურ-ოპერატორების მოწვევა საქართველოში. • ციფრული და PR მარკეტინგი: რეკლამირება სოციალურ ქსელებსა და საძიებო სისტემებში (Meta, TikTok, Google, YouTube, Telegram), ასევე სტატიების გამოქვეყნება წამყვან ადგილობრივ მედიასაშუალებებში. • პარტნიორობა Easy Booking-თან: უზბეკეთის ერთ-ერთ უმსხვილეს ტურისტულ პლატფორმასთან ინტეგრაცია ქართული ტურისტული პროდუქტების პოპულარიზაციისთვის.