„უფასო ელექტროენერგია არავის განუსაზღვრავს, მოსახლეობამ თავად მიიღო გადაწყვეტილება, რომ არ გადაეხადათ“ - სემეკის წევრი მესტიაზე

საქართველოს ენერგეტიკისა და წყალმომარაგების მარეგულირებელი ეროვნული კომისიის წევრმა, გივი სანიკიძემ მედიასთან საუბარში განმარტა, თუ რატომ არ ხდებოდა წლების განმავლობაში სვანეთში ელექტროენერგიის საფასურის გადახდა და რატომ ვერ ახერხებდა ენერგოკომპანია რეგიონის გამრიცხველიანებას.

ჟურნალისტების კითხვაზე, თავის დროზე სვანეთის მომხმარებლებისთვის რატომ განისაზღვრა, რომ ელექტროენერგია უფასო უნდა ყოფილიყო, რით აიხსნება ეს და რა რაოდენობის ელექტროენერგია უნდა მოეხმარათ მათ რეალურად, სემეკის წევრმა უპასუხა, რომ მსგავსი ოფიციალური შეღავათი არასდროს დაწესებულა.

„ასეთი განსაზღვრა არ ყოფილა, უბრალოდ მოსახლეობამ თავად მიიღო გადაწყვეტილება, რომ არ აენაზღაურებინა მოხმარებული კილოვატ საათები. ენერგოკომპანიის მხრიდან გამრიცხველიანების ბევრი მცდელობა, სამწუხაროდ, უშედეგოდ სრულდებოდა, იმიტომ რომ ადგილობრივი მოსახლეობისგან წინააღმდეგობა ხვდებოდა. ამიტომ გახდა აუცილებელი მთავრობის დონეზე გადაწყვეტილების მიღება, რასაც მივესალმებით. შესაბამისად, უკვე ყველა მომხმარებელი უნდა დაექვემდებაროს იმ გადაწყვეტილებას, რაც დღეს მიიღეს და ელექტროენერგიის საფასურის გადახდა აღრიცხული კილოვატ საათების შესაბამისად უნდა მოხდეს, იმ შეღავათების გათვალისწინებით, რაც დღევანდელ [მამუკა მდინარაძის] ბრიფინგზე გაჟღერდა“, - განაცხადა გივი სანიკიძემ.

მედია ასევე დაინტერესდა, ხომ არ ელოდება მარეგულირებელი კომისია ადგილობრივი მოსახლეობის მხრიდან ხელახალ პროტესტს ან წინააღმდეგობას გამრიცხველიანების დაწყების პროცესში, რაზეც სემეკის წევრმა აღნიშნა, რომ ამჯერად პროცესში სახელმწიფო სტრუქტურები იქნებიან ჩართულები.

„ამის შეფასება რთულია, მაგრამ გამომდინარე იქიდან, რომ აღნიშნულ პროცესში ჩაერთვებიან შესაბამისი სტრუქტურები, ჩვენ დიდი იმედი გვაქვს, რომ ეს პროცესი განხორციელდება წარმატებით“, - აღნიშნა სანიკიძემ.

შეგახსენებთ, რომ 1-ელ ივნისს, მთავრობამ მესტიის მუნიციპალიტეტში მასშტაბური გამრიცხველიანების დაწყება დააანონსა, რომლის მთავარი მიზანიც რეგიონში უკანონო კრიპტომაინინგის აღმოფხვრა და ჭარბი ელექტრომოხმარების დარეგულირებაა.