უკრაინამ ელექტროენერგიის შესყიდვაზე ბიზნესისთვის გრძელვადიანი კონტრაქტები დაუშვა
უკრაინულ საწარმოებს შესაძლებლობა ექნებათ, წინასწარ დააფიქსირონ ელექტროენერგიის ფასი კვარტალის, ნახევარი წლის ან ერთი წლის ვადით, რაც მნიშვნელოვნად შეამცირებს მათ დამოკიდებულებას ბაზარზე ფასების მკვეთრ მერყეობაზე.
შესაბამისი გადაწყვეტილება უკრაინის მთავრობამ ელექტროენერგიის ბაზარზე გრძელვადიანი კონტრაქტების მექანიზმის ასამუშავებლად მიიღო.
სამთავრობო გეგმის მიხედვით, არასაყოფაცხოვრებო მომხმარებლები შეძლებენ ელექტროენერგიის ფიქსირებული პირობებით შესყიდვას გამჭვირვალე და კონკურენტუნარიანი აუქციონების მეშვეობით.
საპილოტე პროექტის ფარგლებში, სახელმწიფო ენერგომწარმოებლების „ენერგოატომისა“ და „უკრჰიდროენერგოს“ გენერირებული სიმძლავრეების 4% იქნება გამოყოფილი. უკრაინის მთავრობის განცხადებით, დღესდღეობით ელექტროენერგიის მომხმარებლები დამოკიდებულნი არიან მოკლევადიან შესყიდვებზე, სადაც ფასები ხშირად არასტაბილურია. მაგალითად, ზამთარში მაღალი მოთხოვნის გამო, ტარიფები მკვეთრად იზრდება, გაზაფხულსა და ზაფხულში კი იკლებს. ახალი მექანიზმი კომპანიებს საშუალებას მისცემს წინასწარ განსაზღვრონ ხარჯები, დაგეგმონ ინვესტიციები და საწარმოო პროცესები.
უკრაინის მთავრობაში განმარტავენ, რომ აღნიშნული ცვლილება მხოლოდ კომერციულ სეგმენტს ეხება და მოსახლეობისთვის ტარიფები უცვლელი რჩება.
BM.GE
წყარო: bm.ge