„ვგეგმავთ მაგნოლიას პროექტის მოწესრიგებასაც“ - რა ინფრასტრუქტურული პროექტები იგეგმება აჭარაში?

აჭარის მთავრობის თავმჯდომარემ, ზურაბ პატარაძემ და საქართველოს ინფრასტრუქტურის მინისტრმა, რევაზ სოხაძემ რეგიონში მიმდინარე და დაგეგმილი ინფრასტრუქტურული პროექტები და განვითარების პრიორიტეტები განიხილეს - ინფორმაციას აჭარის მთავრობის პრესცენტრი ავრცელებს.

უმაღლესი საბჭოს თავმჯდომარესთან, აჭარის მთავრობისა და საქართველოს ინფრასტრუქტურის სამინისტროს წარმომადგენლებთან ერთად, მათ ბათუმის სანაპირო ზოლი დაათვალიერეს და ზღვისპირა ტერიტორიაზე ინფრასტრუქტურის განახლების მიზნით დაგეგმილი ღონისძიებები მიმოიხილეს.

უწყების ცნობით, შეხვედრაზე მხარეებმა ყურადღება გაამახვილეს საგზაო, სპორტული, საგანმანათლებლო და ურბანული განვითარების მიმართულებებზე. საუბარი შეეხო ბათუმის ბულვარის რეაბილიტაციას, არდაგანის ტბის ტერიტორიის განახლებას, სკოლებისა და საბავშვო ბაღების მშენებლობას, სპორტული ინფრასტრუქტურის განვითარებასა და ბათუმში მიმდინარე ურბანული განახლების პროექტებს.

ზურაბ პატარაძის განმარტებით, ცენტრალურ ხელისუფლებასთან შეხვედრისას რეგიონისთვის ყველა სტრატეგიული მიმართულება გაიარა:

„საქართველოს ინფრასტრუქტურის მინისტრთან შეხვედრის ფარგლებში განვიხილეთ ყველა მნიშვნელოვანი ინფრასტრუქტურული პროექტი რეგიონში. ასევე, დეტალურად ვისაუბრეთ ბათუმის ბულვარისა და სანაპირო ინფრასტრუქტურის განვითარების საკითხებზე. დავათვალიერეთ არდაგანის ტბის ტერიტორია, სადაც დაგეგმილია მასშტაბური სარეაბილიტაციო სამუშაოები, ვგეგმავთ „მაგნოლიის“ პროექტის მოწესრიგებასაც.

შეხვედრაზე განსაკუთრებული ყურადღება დაეთმო საგანმანათლებლო და სპორტული ინფრასტრუქტურის განვითარების საკითხებს; აქტიურად გაგრძელდება ახალი საბავშვო ბაღების, სკოლების, რაგბის მოედნებისა და მრავალფუნქციური სპორტული კომპლექსების მშენებლობა“.

შეხვედრის დასასრულს აღინიშნა, რომ ცენტრალური და რეგიონული ხელისუფლების კოორდინირებული მუშაობის შედეგად აჭარის ინფრასტრუქტურული განვითარება კიდევ უფრო თვალსაჩინო გახდება, რაც თავის მხრივ ხელს შეუწყობს რეგიონის ეკონომიკურ გაძლიერებასა და ადგილობრივი მოსახლეობის ცხოვრების ხარისხის გაუმჯობესებას.