ვგმობთ მზია ამაღლობელის მიმართ გამოტანილ არაპროპორციულ და პოლიტიზებულ განაჩენს - ევროკავშირის საელჩო

დღეს, 6 აგვისტოს, 1 წელი გავიდა, რაც ბათუმის საქალაქო სასამართლოს მოსამართლე ნინო სახელაშვილმა „ბათუმელებისა“ და „ნეტგაზეთის“ დამფუძნებელსა და დირექტორს მზია ამაღლობელს 2 წლით პატიმრობა მიუსაჯა.

ევროკავშირის საელჩო საქართველოში ამ ფაქტს ეხმაურება და აცხადებს, რომ გმობენ გამოტანილ არაპროპორციულ განაჩენს და მის დაუყოვნებლივ გათავისუფლებას ითხოვენ.

"მზია ამაღლობელისთვის განაჩენის გამოტანიდან ერთი წლის თავზე, ევროკავშირი გმობს მის მიმართ გამოტანილ არაპროპორციულ და პოლიტიზებულ განაჩენს და მისი დაუყოვნებლივი გათავისუფლებისკენ მოუწოდებს", - წერს X-ზე საქართველოში ევროკავშირის წარმომადგენლობა.

განაჩენის გამოცხადების წლისთავს გამოეხმაურა პოლინეთის საელჩოც: "ზუსტად ერთი წლის წინ, ამ დღეს, ცნობილ ქართველ ჟურნალისტს, მზია ამაღლობელს, სასამართლომ ორი წლით თავისუფლების აღკვეთა მიუსაჯა. პოლონეთის საელჩო თბილისში შეშფოთებას კვლავ გამოხატავს, რადგან მიიჩნევს, რომ აღნიშნული განაჩენი არაპროპორციული და პოლიტიკურად მოტივირებულია. ჩვენ სოლიდარობას ვუცხადებთ მზია ამაღლობელს და მოვუწოდებთ მის დაუყოვნებლივ და უპირობოდ გათავისუფლებას".

გასული წლის ბოლოს ევროკავშირმა პატიმრობაში მყოფ მზია ამაღლობელს სახაროვის პრემია, ევროკავშირის ადამიანის უფლებათა უმაღლესი ჯილდო გადასცა. პრემია რუსი მეცნიერისა და დისიდენტის ანდრეი სახაროვის პატივსაცემად 1988 წელს დაწესდა.