რუსული სარაკეტო იერიში კიევის რეგიონზე, 17 დაღუპული და ათობით დაშავებული

რუსულმა ძალებმა კიევზე და კიევის ოლქზე სარაკეტო იერიში მიიტანეს. თავდასხმის შედეგად 17 ადამიანი დაიღუპა, ხოლო დაჭრილთა რიცხვი 44-ს აღწევს.

უკრაინის საჰაერო ძალების ცნობით, ღამის განმავლობაში რუსეთმა 24 ბალისტიკური და 4 საზღვაო საწინააღმდეგო რაკეტა გაუშვა. უკრაინული მხარის ინფორმაციით, რაკეტების ჩამოგდების შესახებ მონაცემები არ გავრცელებულა.

თავდასხმის შედეგად დაზიანდა სამოქალაქო ინფრასტრუქტურა და საწყობები. უკრაინის პრეზიდენტის, ვოლოდიმირ ზელენსკის განცხადებით, სამიზნეებს შორის იყო ლუდსახარშისა და სამშენებლო მასალების მაღაზიების საწყობები, ასევე სარკინიგზო სადგური და სხვა სამოქალაქო ობიექტები. ადგილზე მუშაობას აგრძელებენ საგანგებო სიტუაციების სამსახურები.

თავის მხრივ, რუსეთის თავდაცვის სამინისტრომ დაადასტურა მაღალი სიზუსტის იარაღით დარტყმების მიტანა და განაცხადა, რომ სამიზნეს სატრანსპორტო, ლოგისტიკური და სადისტრიბუციო ცენტრები წარმოადგენდა.

უკრაინის ოფიციალური პირების ცნობით, ივლისში ქვეყნის მასშტაბით რუსული თავდასხმების შედეგად 377 მშვიდობიანი მოქალაქე დაიღუპა და 2,129 პირი დაიჭრა. უკრაინული მხარე აღნიშნავს საჰაერო თავდაცვის სისტემებისა და რაკეტების დეფიციტს და საერთაშორისო პარტნიორებს საჰაერო თავდაცვის საშუალებების მიწოდებისკენ მოუწოდებს.