აჭარის ტელევიზიის წამყვანზე სისტემატური თავდასხმისა და მუქარის გამო გამოძიება დაიწყო

აჭარის ტელევიზიის ტელეწამყვანი კობა ფარტენაძე აცხადებს, რომ ბათუმში ყოველ საღამოს სისტემატურად ხდება თავდასხმის, მუქარისა და სიტყვიერი თუ ფიზიკური შეურაცხყოფის მსხვერპლი. შინაგან საქმეთა სამინისტროს პრესცენტრში ადასტურებენ, რომ აღნიშნულ ფაქტებზე გამოძიება მიმდინარეობს და შესაბამისი საგამოძიებო მოქმედებები ტარდება.

10 აგვისტოს დილას გავრცელებულ ვიდეომასალაში ჩანს, რომ უცხო პირები ჟურნალისტს ჰომოფობიური და შეურაცხმყოფელი ლექსიკით მიმართავენ, გვერდზე გაყოლას სთხოვენ და დაჭრით ემუქრებიან. ფარტენაძის თქმით, იგი ყოველდღიურად აწყდება დისკრიმინაციასა და ძალადობას, რის გამოც საკუთარი უსაფრთხოებისა და ღირსების დასაცავად ვიდეოგადაღება უწევს. ტელეწამყვანი ხაზგასმით აღნიშნავს, რომ არ ითხოვს განსაკუთრებულ მოპყრობას და მხოლოდ უსაფრთხოებას, კანონის დაცვასა და სამართლიანობას ითხოვს.

მომხდარს ჟურნალისტური ეთიკის ქარტიაც გამოეხმაურა. ქარტიამ შინაგან საქმეთა სამინისტროს მოუწოდა, სასწრაფოდ გამოიძიოს ჟურნალისტზე გახშირებული თავდასხმები და უზრუნველყოს მისი უსაფრთხოება, ვიდან მსგავსი ფაქტები ჟურნალისტს მძიმე ემოციურ მდგომარეობაში ამყოფებს და ხელს უშლის პროფესიულ საქმიანობაში.