ადვოკატის შეფასებით სუს-ის ყოფილი უფროსისთვის მისჯილი განაჩენი უსამართლოა

სუს-ის ყოფილი უფროსის, გრიგოლ ლილუაშვილის ადვოკატი ლანა ცერცვაძე თბილისის საქალაქო სასამართლოს მიერ გამოტანილ 13-წლიან პატიმრობის განაჩენს უსამართლოსა და მიკერძოებულს უწოდებს.

უფლებადამცველის განცხადებით, დაცვის მხარეს და თავად მსჯავრდებულს გამამართლებელი განაჩენის მოლოდინი ჰქონდათ, ვინაიდან საქმეში არ არსებობს არცერთი მტკიცებულება, რომელიც ლილუაშვილის ბრალეულობას დაადასტურებდა. ცერცვაძის შეფასებით, სასამართლოს პირველმა ინსტანციამ თავისი ფუნქცია-მოვალეობა ვერ შეასრულა.

ადვოკატმა აღნიშნა, რომ დაუსაბუთებელ გადაწყვეტილებას კანონით დადგენილ ვადაში სააპელაციო სასამართლოში გაასაჩივრებენ. ცერცვაძემ იმედი გამოთქვა, რომ ზემდგომი ინსტანცია მაინც იმოქმედებს კანონის შესაბამისად, შეინარჩუნებს დამოუკიდებელი სასამართლოს სახეს და გადაწყვეტილებას მხოლოს საქმეში არსებული მტკიცებულებების საფუძველზე მიიღებს.

ცნობისთვის, მოსამართლე ნინო თარაშვილმა გრიგოლ ლილუაშვილი დამნაშავედ ცნო ოთხივე წარდგენილ ეპიზოდში — მათ შორის ბაგა-ბაღების სააგენტოს, თაღლითური „ქოლ-ცენტრებისა“ და ეკონომიკის მინისტრის ყოფილი მოადგილის, რომეო მიქაუტაძის დახმარებით ქრთამის აღების ფაქტებზე.