შოიგუ პაპუაშვილს ციტირებს და მის განცხადებას იწონებს, ჩარევაში ადანაშაულებს დასავლეთს

რუსეთის უშიშროების საბჭოს მდივანმა და ყოფილმა თავდაცვის მინისტრმა სერგეი შოიგუმ დასავლეთი სამხრეთ კავკასიაში პოლიტიკურ ვითარებაში "უხეშად ჩარევაში" დაადანაშაულა და ამის მაგალითებად საქართველო და სომხეთი მოიყვანა.

"ისინი [დასავლეთი] ღიად და უხეშად ცდილობენ პოლიტიკურ სიტუაციაში ჩარევას. სამხრეთ კავკასიაში ამის დანახვა შეგვიძლია არა მხოლოდ სომხეთის, არამედ საქართველოს მაგალითზეც", - თქვა მან.

ის ქართული ოცნების პარლამენტის თავმჯდომარეს შალვა პაპუაშვილსაც ციტირებს და აცხადებს, რომ ამ თემაზე შალვა პაპუაშვილმა "ცოტა ხნის წინ ძალიან მკაფიოდ და გონივრულად ისაუბრა და განაცხადა, რომ "შესაძლოა, რუსეთთან ესკალაცია გერმანიის და ლიეტუვის ინტერესებში შედიოდეს, მაგრამ არა - ჩვენსაში".

სერგეი შოიგუმ ასევე თქვა, რომ საქართველოსთან დაკავშირებით "ციფრები თავისთავად მეტყველებს".

"ამ ქვეყნის ეროვნული სტატისტიკის სამსახურის მონაცემებით, 2026 წლის იანვარ-ივლისში რუსეთთან სავაჭრო ბრუნვამ 1,8 მილიარდი აშშ დოლარი შეადგინა, რაც გასული წლის ანალოგიურ პერიოდთან შედარებით 20,7%-ით მეტია", - თქვა სერგეი შოიგუმ.

მისი თქმით, რუსეთი საქართველოს უმსხვილეს სავაჭრო პარტნიორებს შორის მეორე ადგილზეა და თანამშრომლობა კვლავ ფართოვდება.

"ჩვენ მზად ვართ, ხელი შევუწყოთ რუსეთ-საქართველოს ეკონომიკური და ჰუმანიტარული კავშირების განვითარებას", - აცხადებს ის.