4 ოქტომბრის საქმეზე დანაშაული კიდევ ექვსმა ბრალდებულმა აღიარა - მათთან საპროცესო შეთანხმება გაფორმდა

4 ოქტომბრის საქმეზე დანაშაული კიდევ ექვსმა ბრალდებულმა აღიარა.

დანაშაულის აღიარების შემდეგ, მათთან საპროცესო შეთანხმება გაფორმდა.

გიორგი ქორქიამ, გიორგი რურუამ, ხვიჩა გოგოხიამ, ლევან ჯიქიამ, ლაშა ივანაძემ და სერგო მეგრელიშვილმა აღიარეს ჩადენილი დანაშაული, კერძოდ, რომ ისინი მონაწილეობას იღებდნენ ჯგუფურ ძალადობაში და ასევე მცდელობა ჰქონდათ პრეზიდენტის სასახლის ხელში ჩაგდების.

საპროცესო შეთანხმების გაფორმების შემდეგ, ექვსივე ბრალდებული სამწლიანი პირობითი მსჯავრით გათავისუფლდება და ამ საკითხზე სასამართლო იმსჯელებს.

დღევანდელ სასამართლო სხდომაზე მოსამართლე რომეო ტყეშელაშვილმა ექვსივე ბრალდებულისგან პირადად მოისმინა, რომ ისინი საკუთარი ნებით და სურვილით აღიარებენ ბრალს და წარდგენილ ბრალდებაში თავს დამნაშავედ ცნობენ.

აღნიშნულის შედეგად, ექვსივე პირის საქმე ცალკე წარმოებად გამოიყო და საქმეს სხვა მოსამართლე უახლოეს დღეებში განიხილავს. საქმეზე მსჯელობის შემდეგ, ექვსივე ბრალდებული სასამართლო სხდომიდან გათავისუფლდება.

4 ოქტომბრის საქმეზე, საერთო ჯამში, დანაშაული 21-მა ბრალდებულმა აღიარა. 8 ბრალდებული კი დანაშაულს არ აღიარებს.