თავდაცვის მინისტრმა სლოვაკეთის შეიარაღებული ძალების გენერალური შტაბის უფროსს უმასპინძლა
საქართველოს ვიცე-პრემიერი, თავდაცვის მინისტრი ირაკლი ჩიქოვანი სლოვაკეთის შეიარაღებული ძალების გენერალური შტაბის უფროსს, გენერალ დანიელ ზმეკოს შეხვდა, რომელიც საქართველოში ოფიციალური ვიზიტით იმყოფებოდა.
შეხვედრაზე ორ ქვეყანას შორის თავდაცვის სფეროში თანამშრომლობისა და რეგიონული უსაფრთხოების საკითხები განიხილეს.
მინისტრმა სლოვაკეთის დელეგაციას საქართველოს ტერიტორიული მთლიანობისა და სუვერენიტეტის მხარდაჭერისთვის მადლობა გადაუხადა.
თავდაცვის უწყებაში სლოვაკეთის შეიარაღებული ძალების გენერალური შტაბის უფროსის ოფიციალური დახვედრის ცერემონია გაიმართა. გენერალ დანიელ ზმეკოს ქართველმა კოლეგამ, საქართველოს თავდაცვის ძალების მეთაურმა, გენერალ-ლეიტენანტმა გიორგი მათიაშვილმა უმასპინძლა. გენერალურ შტაბში გამართულ შეხვედრაზე მხარეებმა ორ ქვეყანას შორის სამხედრო მიმართულებით თანამშრომლობაზე ისაუბრეს. საქართველოს თავდაცვის ძალების მეთაურმა ხაზგასმით აღნიშნა გენერალ დანიელ ზმეკოს წვლილი თავდაცვის სფეროში თანამშრომლობის გაღრმავებაში. სლოვაკეთის შეიარაღებული ძალების გენერალური შტაბის უფროსმა, დელეგაციის წევრებთან ერთად პატივი მიაგო საქართველოს ტერიტორიული მთლიანობისათვის დაღუპულ გმირთა ხსოვნას და გმირთა მემორიალი გვირგვინით შეამკო.
საქართველოში ვიზიტის ფარგლებში, სლოვაკეთის შეიარაღებული ძალების გენერალური შტაბის დელეგაციამ ასევე დაათვალიერა ნატო-საქართველოს წვრთნებისა და შეფასების ერთობლივი ცენტრი (JTEC).
ინფორმაციას თავდაცვის სამინისტრო ავრცელებს.
იმედი
წყარო: imedinews.ge