ახალი გამოკითხვის თანახმად, აშშ-ში ერთნაირსქესიანთა ქორწინების მხარდაჭერა შემცირდა

ორგანიზაცია Gallup-ის მიერ ჩატარებული გამოკითხვის მიხედვით, ბოლო წლებში ამერიკელთა მხარდაჭერა ერთნაირსქესიანთა ქორწინების მიმართ შემცირდა, მიუხედავად იმისა, რომ მანამდე რეკორდულ მაჩვენებელს მიაღწია. ინფორმაციას ამერიკული მედია ავრცელებს.

მედიის ცნობით, ეს მნიშვნელოვანი ცვლილებაა, რადგან ერთნაირსქესიანთა ქორწინების მიღება და მხარდაჭერა აშშ-ში ორ ათწლეულზე მეტი ხნის განმავლობაში მუდმივად იზრდებოდა. დღეს აშშ-ის ზრდასრული მოსახლეობის დაახლოებით 65% მიიჩნევს, რომ ერთნაირსქესიანთა ქორწინება კანონიერი უნდა იყოს. ეს მაჩვენებელი ნაკლებია 2022 და 2023 წლებში დაფიქსირებულ რეკორდულ 71%-თან შედარებით.

როგორც მედია იუწყება, ეს ტენდენცია განსაკუთრებით მნიშვნელოვანია, რადგან, შესაძლოა, მიუთითებდეს გარდამტეხ მომენტზე თანამედროვე ამერიკის ისტორიაში საზოგადოებრივი აზრის ერთ-ერთი ყველაზე მასშტაბური ცვლილების პროცესში. 2015 წელს, მას შემდეგ, რაც აშშ-ის უზენაესმა სასამართლომ მთელი ქვეყნის მასშტაბით ერთნაირსქესიანთა ქორწინება დააკანონა, ფართოდ იყო გავრცელებული მოსაზრება, რომ საზოგადოების მხარდაჭერა სტაბილური იყო ან კიდევ უფრო იზრდებოდა.

თუმცა, უახლესი მონაცემები აჩვენებს, რომ ეს ხანგრძლივი აღმავალი ტენდენცია შეჩერდა და საზოგადოებრივი აზრი, შესაძლოა, სტაგნაციის, ან თუნდაც უკუსვლის ეტაპზე გადავიდეს.

Gallup-ის „ღირებულებებისა და შეხედულებების“ უახლესი კვლევის მიხედვით, რომელიც „ღირსების თვის“ მესამე დღეს გამოქვეყნდა, ამერიკელთა 65% მხარს უჭერს ერთნაირსქესიანთა ქორწინების დაკანონებას, მაშინ, როცა 2022 და 2023 წლებში ეს მაჩვენებელი 71% იყო. ამასთან, ქვეყნის მასშტაბით მოსახლეობის 62% მიიჩნევს, რომ გეებისა და ლესბოსელების ურთიერთობები „მორალურად მისაღებია“, რაც 2016 წლის შემდეგ ყველაზე დაბალი მაჩვენებელია.

განსაკუთრებით აღსანიშნავია ისიც, რომ მხარდაჭერა შემცირდა ყველა პოლიტიკური შეხედულების მქონე ჯგუფში, თუმცა შემცირების მასშტაბი ერთმანეთისგან განსხვავდებოდა.

კომპანია Three Day Rule-ის აღმასრულებელი დირექტორი ადამ კოენ-ასლატეი მიიჩნევს, რომ ეს ცვლილება უფრო მეტად აშშ-ში არსებული პოლიტიკური გარემოს ცვლილებით არის განპირობებული, ვიდრე ერთნაირსქესიანთა ქორწინების მხარდაჭერის რეალური შემცირებით.