აშშ-სა და საუდის არაბეთს შორის გაფორმდა შეთანხმება, რომელიც სამეფოს ტერიტორიაზე სამოქალაქო ბირთვული პროგრამის განვითარებას ისახავს მიზნად

აშშ-სა და საუდის არაბეთს შორის ოთხშაბათს გაფორმდა შეთანხმება, რომელიც სამეფოს ტერიტორიაზე სამოქალაქო ბირთვული პროგრამის განვითარებას ისახავს მიზნად.

აშშ-ის ენერგეტიკის დეპარტამენტში აღნიშნავენ, რომ დოკუმენტი შექმნის იურიდიულ ბაზას ათწლეულებზე გათვლილი, მრავალმილიარდიანი პარტნიორობისთვის.

შეთანხმება ამერიკულ საწარმოებს შესაძლებლობას მისცემს ჩაერთონ საუდის არაბეთის ბირთვულ ენერგოპროექტებში, რაც ხელს შეუწყობს აღნიშნულ დარგში ამერიკული ტექნოლოგიების ექსპორტის ზრდას.

აშშ-ის ენერგეტიკის მდივანმა, კრის რაიტმა და საუდის არაბეთის ენერგეტიკის მინისტრმა, პრინცმა აბდულაზიზ ბინ სალმანმა ასევე მოაწერეს ხელი ორმხრივ შეთანხმებას ბირთვული უსაფრთხოების გარანტიების შესახებ.

რაიტის თქმით, დოკუმენტი „უზრუნველყოფს ბირთვული უსაფრთხოებისა და გაუვრცელებლობის უმაღლეს სტანდარტებს და ამავდროულად, დაეყრდნობა ამერიკულ მოწინავე ტექნოლოგიებსა და მეცნიერებს“.