Axios: აშშ და ირანი წინასწარ სამშვიდობო შეთანხმებას დისტანციურად მოაწერენ ხელს

აშშ, ირანი, ასევე მოლაპარაკებებში შუამავლები კატარიდან და პაკისტანიდან დღეს ვირტუალური შეხვედრის მოწყობას გეგმავენ, რომელზეც ურთიერთგაგების მემორანდუმს „ელექტრონულად“ მოაწერენ ხელს. ინფორმაციას Axios-ი წყაროებზე დაყრდნობით ავრცელებს.

სავარაუდოდ, დოკუმენტი 60 დღით გაახანგრძლივებს ცეცხლის შეწყვეტის რეჟიმს, გახსნის ჰორმუზის სრუტეს და საფუძველს ჩაუყრის მოლაპარაკებებს ირანის ბირთვულ პროგრამასთან დაკავშირებით.

მანამდე აშშ-ის პრეზიდენტმა დონალდ ტრამპმა, რომელმაც უკვე არაერთხელ დააანონსა ირანთან გარიგების დადება, განაცხადა, რომ შეთანხმებას ხელი 14 ივნისს მოეწერება. ამავდროულად, ირანის საგარეო საქმეთა სამინისტროში აცხადებდნენ, რომ კვირას არანაირი დოკუმენტის ხელმოწერას არ გეგმავენ.

მოსალოდნელია, რომ ირანი და აშშ სამშვიდობო შეთანხმებას ორ ეტაპად გააფორმებენ: ჯერ ხელი მოეწერება 14-პუნქტიან მემორანდუმს, ხოლო შემდეგ, კიდევ 60 დღის განმავლობაში, მხარეები ომის საბოლოო დასრულებაზე შეთანხმდებიან.