Axios: ტრამპმა ირანთან უკვე შეთანხმებულ ხელშეკრულებაში ცვლილებების შეტანა მოითხოვა

აშშ-ის პრეზიდენტმა დონალდ ტრამპმა ვაშინგტონსა და თეირანს შორის სამშვიდობო შეთანხმების პროექტში რამდენიმე ცვლილების შეტანა მოითხოვა, - იტყობინება Axios-ი საკუთარ წყაროებზე დაყრდნობით.

ამერიკელი ჩინოვნიკების განცხადებით, ტრამპს სურს, შეთანხმებაში ირანის ბირთვულ პროგრამასთან დაკავშირებით კონკრეტული დათმობები იხილოს. შეთანხმება არსებული სახით მოიცავს მხოლოდ ირანის ვალდებულებას, არ შექმნას ბირთვული იარაღი. ტრამპს სურს, ხელშეკრულებაში გაიწეროს უფრო მკაფიო ვადები და პირობები, რომელთა მიხედვითაც აშშ უკვე გამდიდრებულ ირანულ ურანს მიიღებს.

გამოცემის ერთ-ერთმა თანამოსაუბრემ აღნიშნა, რომ ტრამპს ასევე სურს, შეცვალოს ზოგიერთი ფორმულირება, რომელიც ჰორმუზის სრუტის მუშაობის განახლებას ეხება.

„გარიგება შედგება. რამდენად მალე მოხდება ეს, ვნახავთ. ჩვენ მზად ვართ, მოვიცადოთ, რათა პრეზიდენტმა მიიღოს ის, რასაც ითხოვს. ამას შესაძლოა ერთი კვირა დასჭირდეს, შესაძლოა ნაკლები, შესაძლოა მეტიც. იმედი გვაქვს, რომ კვირის ბოლოსთვის რაღაც ხელშესახები გვექნება“, - განაცხადა ამერიკელმა წყარომ.

იმის შესახებ, რომ ტრამპმა შეთანხმების პირობების გამკაცრება გადაწყვიტა, The New York Times-იც იტყობინებოდა. მისი ინფორმაციით, აშშ-ის პრეზიდენტი შეშფოთებულია შეთანხმების ზოგიერთი დებულების გამო, რომლებიც ირანის გაყინული აქტივების განბლოკვას ითვალისწინებს.